Toy məclisi təşkil edən şəxslər cərimələndi - FOTO

Azərbaycanın Bakı şəhərinin Sabunçu rayonunda xüsusi karantin rejimi qaydalarına zidd olaraq gizli şəkildə kiçik toy məclisi təşkil edilməsinin qarşısı polislər tərəfindən alınıb.

Azərbaycanın Daxili İşlər Nazirliyinin mətbuat xidmətindən verilən məlumata görə, Sabunçu Rayon Polis İdarəsinin 12-ci Polis Şöbəsinə Ramana qəsəbəsi, Şuşa şəhərciyində yaşayan Azad Cavadovun oğluna toy məclisi təşkil etməsi barədə məlumat daxil olub.

Polis əməkdaşları dərhal həmin əraziyə yollanaraq, karantin rejimi qaydalarının pozulması halını aşkar ediblər.

Məclisin təşkilatçısı A.Cavadov və daha 15 nəfər qonaq saxlanılaraq, Polis Şöbəsinə gətirilib.

Xüsusi karantin rejimi qaydalarını pozan ümumilikdə 16 nəfər barəsində Polis Şöbəsində İnzibati Xətalar Məcəlləsinin 211-ci maddəsi ilə tədbir görülüb və onların hər biri 200 manat (360 lari) məbləğində cərimə edilib.