CNN: ABŞ–İran qarşıdurmasının güclənməsi fonunda neftin qiyməti bahalaşır

ABŞ və İran arasında hücumların intensivləşməsi fonunda dünya bazarında neftin qiyməti artmaqda davam edir. Bu vəziyyət İranın Hörmüz boğazını bağlaya biləcəyi ilə bağlı narahatlıqları daha da gücləndirib.

InterPress.ge xəbər verir ki, bu barədə CNN məlumat yayıb.

Məlumata görə, Brent markalı neftin qiyməti 3,60% artaraq bir barel üçün 78,70 ABŞ dollarına, WTI markalı Amerika nefti isə 3,50% bahalaşaraq 73,92 ABŞ dollarına yüksəlib.

CNN qeyd edir ki, buna baxmayaraq, hazırkı qiymətlər müharibə dövründə qeydə alınan səviyyədən xeyli aşağıdır. Belə ki, əvvəllər Brent markalı neftin qiyməti bir barel üçün 120 ABŞ dollarını keçmişdi.

Deutsche Bank investisiya bankının analitiklərinin fikrincə, ABŞ və İran arasında qarşıdurmanın əsas mərkəzi getdikcə daha çox Hörmüz boğazına yönəlir.

Materialda qeyd olunur ki, İran boğazın faktiki olaraq bağlandığını bildirərək gəmilərə tranzitdən çəkinməyi tövsiyə edir. Eyni zamanda, ABŞ rəsmiləri boğazın açıq qaldığını bildirir və kommersiya gəmilərinin təhlükəsiz keçidini aktiv şəkildə təmin etdiklərini bəyan edirlər.

Deutsche Bank analitikləri bazar ertəsi yayımladıqları hesabatda bildiriblər:

"Gəmilərin zədələnməsi, raket və pilotsuz uçuş aparatlarının preventiv şəkildə məhv edilməsi, həmçinin Fars körfəzi boyunca hərbi və enerji obyektlərinə endirilən zərbələr münaqişənin miqyasının genişləndiyini göstərir."