Gürcüstan Təhsil Nazirliyi məktəblərdə infrastruktur işləri ilə bağlı açıqlama yayıb

Gürcüstan Təhsil, Elm və Gənclər Nazirliyi dövlət məktəblərində planlaşdırılan infrastruktur işləri ilə bağlı açıqlama yayıb. Nazirlik bildirir ki, bəzi məktəblərdə tədris prosesinin alternativ məkanlara köçürülməsi müvəqqəti zərurətdir və məqsəd şagirdlərin sonradan yenilənmiş, təhlükəsiz və müvafiq şəraitdə təhsillərini davam etdirmələrini təmin etməkdir.

InterPress.ge xəbər verir ki, nazirliyin məlumatına görə, məktəblərdə infrastruktur işlərinin əsas məqsədi şagirdlər və müəllimlər üçün təhlükəsiz, müasir standartlara uyğun təhsil mühiti yaratmaqdır. Nazirlik sosial şəbəkələrdə məktəb ərazilərinin satılması və ya özgəninkiləşdirilməsi ilə bağlı yayılan məlumatları “tamamilə yalan” adlandırıb.

“Yüksək ictimai marağı nəzərə alaraq, bu proseslə bağlı bir daha ətraflı izah veririk. Məktəb infrastrukturunun yenilənməsi və inkişafı məqsədilə Gürcüstan Təhsil, Elm və Gənclər Nazirliyi cari ildə infrastruktur işlərinin aparılmasına ehtiyac olan dövlət məktəblərinin siyahısını müəyyən edib.

Siyahı Gürcüstan Regional İnkişaf və İnfrastruktur Nazirliyinə göndərilib ki, müvafiq ekspert qiymətləndirmələri və Levan Samxarauli adına Məhkəmə Ekspertizası Milli Bürosunun rəyləri əsasında hər bir məktəb üzrə görülməli işlərin xarakteri və miqyası müəyyənləşdirilsin. Bu çərçivədə məktəbin tam təmir ediləcəyinə, yoxsa mövcud vəziyyətdən irəli gələrək həmin ərazidə yeni məktəbin tikilməsinin zəruri olduğuna qərar verilir.

İctimaiyyətə həmçinin izah etmək istəyirik ki, konkret məktəb binasına Levan Samxarauli adına Məhkəmə Ekspertizası Milli Bürosunun ekspertiza rəyi əsasında IV kateqoriya verildikdə nə baş verir. Hökumətin qərarına əsasən, IV kateqoriya binanın 30-50 faizinin zədələnməsi, onun istismarının təhlükə yaratması və xarici təsir zamanı ayrı-ayrı konstruksiyaların dərhal uçması riskinin mövcud olması deməkdir.

Müvafiq olaraq, konkret məktəb üzrə IV kateqoriya müəyyən edildiyi andan Gürcüstan Təhsil, Elm və Gənclər Nazirliyi dərhal preventiv qərar qəbul edir və tədris prosesinin müvəqqəti olaraq, təxminən bir həftə müddətinə, distant rejimə keçirilməsini təmin edir.

Vacibdir ki, IV kateqoriyanın verilməsi avtomatik olaraq məktəbin yeni binasının tikilməsinin zəruri olması demək deyil. Hər bir hal əlavə ekspert qiymətləndirməsi və müvafiq qurumların birgə qərarı əsasında fərdi qaydada qiymətləndirilir.

Hər bir hadisənin ayrıca araşdırılması üçün qurumlararası komissiya yaradılır. Komissiyada hər bir qurum öz səlahiyyətləri çərçivəsində məktəb binasının vəziyyətini qiymətləndirir və iki əsas məsələni müzakirə edir: tədris prosesinin həmin binada davam etdirilməsinin mümkün olub-olmaması, bunun üçün hansı işlərin görülməsinin zəruri olduğu və tədris prosesinin binada nə qədər müddət davam etdirilə biləcəyi; əgər tədrisin həmin ərazidə davam etdirilməsi mümkün deyilsə, uyğun alternativ tədris məkanının təcili şəkildə necə tapılması və paralel olaraq yeni məktəbin tikintisi üçün genişmiqyaslı işlərin planlaşdırılması və həyata keçirilməsinə necə başlanılması.

Komissiyanın qərarları iki əsas prinsipə – şagirdlərin və personalın təhlükəsizliyinin qorunmasına və tədris prosesinin fasiləsizliyinin təmin edilməsinə əsaslanır. Məktəb binalarının faktiki vəziyyətindən asılı olaraq, komissiyanın qərarı müxtəlif məktəblər üzrə fərqli ola bilər.

Komissiya ekspertlərin tövsiyəsinə əsasən məktəbdə bütün zəruri işlərin aparılmasına və tədris prosesinin müvəqqəti olaraq həmin binada davam etdirilməsinə, eyni zamanda binanın istismarı dövründə onun vəziyyətinin daimi monitorinqinin aparılmasına qərar verə bilər.

Belə halda işlər podratçı şirkət tərəfindən Bələdiyyə İnkişaf Fondunun müvafiq səlahiyyətli mütəxəssislərinin ciddi texniki nəzarəti və monitorinqi altında həyata keçiriləcək. İşlərin gedişinə və keyfiyyətinə Levan Samxarauli adına Məhkəmə Ekspertizası Milli Bürosunun mütəxəssisləri tərəfindən fasiləsiz fərdi ekspert nəzarəti həyata keçiriləcək.

İşlər aparılarkən şagirdlərin və məktəb personalının təhlükəsizliyi üçün bütün zəruri tədbirlər görüləcək. Şagirdlərin və məktəb əməkdaşlarının təhlükəsizliyinin qorunması məqsədilə Gürcüstan Təhsil, Elm və Gənclər Nazirliyinin Mandatur Xidməti əlavə personal ayıracaq.

Bununla yanaşı, Təhsil, Elm və Gənclər Nazirliyi məktəbin binası ilə bağlı növbəti genişmiqyaslı işlərin planlaşdırılması və həyata keçirilməsinin mümkün olması üçün uyğun alternativ məkanların axtarışını davam etdirəcək.

Məktəbin mövcud binasında tədris prosesinin davam etdirilməsinə icazə verilmədiyi halda isə komissiya tədris prosesinin alternativ məkanda davam etdirilməsi barədə qərar qəbul edir. Paralel olaraq, Regional İnkişaf və İnfrastruktur Nazirliyi məktəb binasının tam təmirinin və ya yeni məktəbin tikintisinin nə vaxt başlayacağı, neçə mərhələdə, hansı müddətlərdə həyata keçiriləcəyi və başa çatdırılacağı ilə bağlı konkret plan-qrafik üzərində işə başlayır.

Biz yaxşı başa düşürük ki, məktəb infrastrukturu təhsil sisteminin mühüm problemlərindən biridir. Məhz buna görə məktəb infrastrukturunun genişmiqyaslı yenilənməsi prosesinə başlamışıq. Məqsəd mövcud problemləri sistemli və ardıcıl şəkildə həll etmək, hər bir şagird üçün təhlükəsiz, müasir və layiqli təhsil mühiti yaratmaqdır.

İctimaiyyətin bilməsi vacibdir ki, bu proses çərçivəsində qərarlar müvafiq qurumların, ekspertlərin və yerli ictimaiyyətin iştirakı ilə, konkret hallar və peşəkar qiymətləndirmələr əsasında qəbul edilir.

Təəssüf ki, ayrı-ayrı şəxslərin bu məsələdən siyasi maraqlar naminə istifadə etməsi və cəmiyyəti yanlış yönləndirməyə cəhd göstərməsi yalnız cari prosesə deyil, həm də şagird və müəllimlərin maraqlarına zərər vurur.

Konkret şəxsləri və media vasitələrini məsələyə məsuliyyətlə yanaşmağa və yanlış məlumatların yayılmasından çəkinməyə çağırırıq”, – deyə nazirliyin açıqlamasında bildirilib.