Tramp dizel yanacağının qiymətinin azaldılması ilə bağlı sərəncam imzalayıb

ABŞ Prezidenti Donald Tramp dizel yanacağının qiymətinin azaldılması məqsədilə icra sərəncamı imzalayıb.

InterPress.ge xəbər verir ki, CNN-in məlumatına görə, Tramp qırmızı rəngə boyanmış dizel yanacağı ilə bağlı məhdudiyyətlərin aradan qaldırılmasını nəzərdə tutan sərəncam imzalayıb. Sərəncamın dizel yanacağının qiymətinin rekord aşağı səviyyələrə endirilməsinə xidmət edəcəyi bildirilir.

Donald Tramp Nebraska ştatında tərəfdarları qarşısında çıxışı zamanı bildirib ki, sözügedən sərəncamla “qırmızı rəngə boyanmış dizeli vergisiz şəkildə almaq mümkün olacaq”.

“Bu sərəncam bütün növ malların, xüsusilə də ərzaq məhsullarının qiymətlərinin aşağı düşməsinə kömək edəcək”, – Tramp qeyd edib.

Qırmızı rəngə boyanmış dizel yanacağı kimyəvi tərkibinə görə adi dizel yanacağından fərqlənmir. Yeganə fərq onun rəngi və təyinatıdır. Qırmızı rəngli dizel yanacağı vergidən azaddır və yalnız kənd təsərrüfatı məqsədləri üçün nəzərdə tutulub.

Nəşrin məlumatına görə, vergidən azad dizel yanacağından istifadəyə icazə verilməsi ilk növbədə yük avtomobillərinin sürücülərinə fayda verəcək.