Gürcüstan Rusiyanın Ukraynanın işğal olunmuş ərazilərində təşkil etdiyi qanunsuz referendumları qınadı

"Gürcüstan Rusiyanın Ukraynanın işğal olunmuş ərazilərində təşkil etdiyi qanunsuz referendumları pisləyir. Ukrayna ərazilərini ilhaq etmək üçün bu cəhdlər qəbuledilməzdir".

InterPress.ge xəbər verir ki, bu barədə Gürcüstan Xarici İşlər Nazirliyinin rəsmi “Twitter” səhifəsində bildirilib.

Xarici İşlər Nazirliyi vurğulayıb ki, “Gürcüstan Ukraynanın suverenliyini və ərazi bütövlüyünü güclü şəkildə dəstəkləyir”.

Xatırladaq ki, Ukraynanın dörd vilayətinin müvəqqəti işğal olunmuş ərazilərində sentyabrın 23-27-də qondarma  “referendum”  keçirilib. İşğal rejimi “referendumlar”ın nəticələrini dərc edib, ona görə “səsvermə” iştirakçılarının böyük bir hissəsi Rusiyaya birləşməyi dəstəkləyir.