II rübdə Gürcüstana yatırılan birbaşa xarici investisiyaların həcmi artıb

İlkin məlumatlara görə, 2023-cü ilin ikinci rübündə Gürcüstana qoyulmuş birbaşa xarici investisiyaların həcmi 505,7 milyon ABŞ dolları təşkil edib ki, bu da 2022-ci ilin ikinci rübünün dəqiqləşdirilmiş məlumatından 29,9 faiz çoxdur.

InterPress.ge xəbər verir ki, bu barədə Gürcüstanın Milli Statistika Xidməti məlumat yayıb.

Məlumata görə, 2023-cü ilin II rübündə nizamnamə kapitalı əvvəlki ilin müvafiq dövrü ilə müqayisədə 23,3 faiz azalaraq 72,9 milyon ABŞ dolları təşkil edib ki, bu da birbaşa xarici investisiyaların ümumi həcminin 14,4 faizini təşkil edir.

“2023-cü ilin II rübündə Gürcüstana yatırılan birbaşa xarici investisiyalara əsasən, ən böyük investor ölkələri aşağıdakı kimi bölüşdürülüb. Birinci yerdə Böyük Britaniyadır - 168,3 milyon ABŞ dolları ilə, bu da ümumi birbaşa xarici investisiyaların 33,3 faizini təşkil edir. İkinci yerdə Türkiyə - 71,0 milyon ABŞ dolları (14,0 faiz), üçüncü yerdə isə 62,7 milyon ABŞ dolları (12,4 faiz) ilə Hollandiya qərarlaşıb. Ən böyük sərmayədar beş ölkənin payı investisiyaların ümumi həcmində 78,0 faiz təşkil edir.2023-cü ilin II rübündə ən böyük birbaşa xarici investisiya maliyyə və sığorta fəaliyyəti sektoruna qoyulmuş və 255,7 milyon ABŞ dolları təşkil etmişdir ki, bu da ümumi birbaşa xarici investisiyaların 50,6 faizini təşkil edir. İkinci yeri 137,2 milyon ABŞ dolları ilə (27,1 faiz) enerji sektoru, üçüncü yeri isə 35,6 milyon ABŞ dolları ilə (7,0 faiz) emal sənayesi sektoru tutur”- deyə məlumatda qeyd olunub.