Avropa İttifaqı Ukraynaya dronların, raketlərin, müdafiə sistemlərinin və döyüş sursatlarının alınması üçün 1,71 milyard avro köçürüb.
InterPress.ge xəbər verir ki, bu barədə Avropa Komissiyasının yaydığı məlumatda bildirilib.
Vəsait Ukraynaya ayrılmış 90 milyard avroluq kreditin müdafiə komponenti çərçivəsində təqdim olunub və hərbi təyinatlı məhsulların alınmasına yönəldiləcək.
Avropa Komissiyasının Prezidenti Ursula fon der Lyayen bildirib ki, Aİ Rusiyanın təcavüzkar müharibəsinin ilk günündən etibarən olduğu kimi, Ukraynaya güclü dəstəyini davam etdirəcək.
“Biz Ukraynanı qətiyyətlə dəstəkləməyə davam edəcəyik. Eyni zamanda, Ukraynanın suverenliyini, ərazi bütövlüyünü və Avropanın təhlükəsizliyini qoruyacaq ədalətli və davamlı sülhün təmin edilməsi istiqamətində fəaliyyətimizi davam etdiririk”, – deyə Ursula fon der Lyayen qeyd edib.
Avropa Komissiyasının məlumatına görə, bu, 90 milyard avroluq kreditin müdafiə komponenti çərçivəsində Ukraynaya ayrılan səkkizinci tranşdır.
Bildirilib ki, cari ilin sonunadək həmin kredit çərçivəsində Ukraynanın istifadəsinə verilə biləcək daha 23,6 milyard avro vəsait qalır.
