Saxta valyuta satmaq faktı ilə bağlı dörd nəfər saxlanıldı

Gürcüstan Maliyyə Nazirliyinin İstintaq Xidməti əməkdaşlarının həyata keçirdikləri əməliyyat-istintaq tədbirləri nəticəsində külli miqdarda saxta valyuta satmaq faktı ilə bağlı 4 nəfər saxlanılıb.

InterPress.ge xəbər verir ki, məlumatı İstintaq Xidməti yayıb.

İstintaq müəyyən edib ki, təqsirləndirilən şəxslər qanunsuz maddi gəlir əldə etmək məqsədilə Tbilisi şəhərində 29 900 ABŞ dolları dəyərində saxta 100 dollarlıq əskinas satıblar.

Bundan əlavə, təqsirləndirilən şəxslərdən əlavə olaraq 2 ədəd 100 dollarlıq və 1 ədəd 50 avroluq saxta əskinaslar götürülüb.

İstintaq Gürcüstan Cinayət Məcəlləsinin cəza olaraq 7 ildən 10 ilədək həbsi nəzərdə tutan 212-ci maddəsinin ikinci hissəsi ilə aparılır.