İran XİN: İsrail hücumları dayandırılmayana qədər heç bir tərəflə danışıqlar aparılmayacaq

İranın Xarici İşlər Naziri Abbas Araqçi bildirib ki, rəsmi Tehran heç bir ölkə ilə danışıqlara başlamayacaq, nə qədər ki, İsrail İrana qarşı hücumlarını davam etdirir.

InterPress.ge xəbər verir ki, bu barədə o, İranın dövlət televiziyasına müsahibəsində danışıb.

Araqçinin sözlərinə görə, ABŞ İranın nüvə proqramı ilə bağlı danışıqlar masasına qayıtmaq istəyir, lakin Tehran bu istəyi rədd edib.

“İsrailin təcavüzü dayandırılmayana qədər ABŞ-la danışıqların aparılması mümkün deyil”, – deyə Abbas Araqçi qeyd edib və ABŞ-ı İsrailin İrana qarşı hücumlarında “cinayət ortağı” olmaqda ittiham edib.

Qeyd edək ki, bu gün Cenevrədə İran, Birləşmiş Krallıq, Almaniya və Fransanın xarici işlər nazirlərinin – Abbas Araqçi, David Lammy, Yohan Vadeful və Jan-Noel Barro – iştirakı ilə görüş keçiriləcək.

İran Xarici İşlər Nazirliyinin sözçüsü İsmayıl Baqai ötən gün bildirib ki, tərəflər görüşdə İranın nüvə proqramı və İsrailin son hücumlarından sonra bölgədə yaranmış vəziyyəti müzakirə edəcəklər.