İranın yeni ali lideri Müctəba Xamenei: “Daxili və xarici düşmənlərin təhlükəsizliyi əlindən alınmalıdır”

İranın yeni ali lideri Müctəba Xamenei ölkəsinin daxili və xarici düşmənlərinə qarşı sərt mövqe sərgiləyib.

InterPress.ge xəbər verir ki, bu barədə The Times of Israel nəşri məlumat yayıb.

Məlumata görə, Müctəba Xamenei bu fikirləri İran prezidenti Məsud Pezeşkiana ünvanladığı məktubda bildirib. Məktub İsrail tərəfindən öldürüldüyü bildirilən kəşfiyyat naziri İsmayıl Xatibin ölümü ilə bağlı başsağlığı xarakteri daşıyır.

Ayətullah qeyd edib ki, nazirlik Xatibin öldürülməsinə İranın “daxili və xarici düşmənlərinin” təhlükəsizliyini pozmaqla cavab verməlidir.

Qeyd olunur ki, Müctəba Xamenei atası, 86 yaşlı əvvəlki ali lider Ayətullah Əli Xameneinin ölümündən sonra bu vəzifəyə gətirilib. Əli Xamenei müharibənin ilk günü – fevralın 28-də İsrailin hava zərbəsi nəticəsində həlak olub.

Məlumata görə, yeni ali lider təyin olunduqdan sonra hələ ictimaiyyət qarşısına çıxmayıb. ABŞ və İsrail rəsmiləri onun yaralanmış ola biləcəyini ehtimal edir.