“Lelo” partiyasının deputatı: "Prezidentin Nika Qvaramiyanı əfv etməsi depolarizasiyaya təkan verəcək addımlardan biri olacaq"
“Lelo” partiyasının deputatı Salome Samadaşvilinin bəyan etdiyinə görə, “Mtavari Arxi”nin baş direktoru Nika Qvaramiyanın prezident Salome Zurabişvili tərəfindən əfv olunması depolarizasiyaya təkan verəcək addımlardan biri olacaq.
InterPress.ge xəbər verir ki, o, bu barədə jurnalistlərə açıqlama verib.
O bildirib ki, prezident milli razılıq prosesi ilə bağlı yenidən görüşlər keçirsə, “Lelo” iştirak edəcək.
“Milli razılıq mövzusuna gəlincə, bilirsiniz ki, Gürcüstan prezidenti bu prosesə töhvə vermək arzusunu bildirən kimi biz görüşlərdə iştirak etdik. Əgər növbəti görüşlər olarsa, düşünürəm ki, biz iştirak etməyə davam edəcəyik, amma vurğulamaq istəyirəm ki, bu gün cəmiyyətimizin parçalanmasına və ölkədə qütbləşmənin yaranmasına səbəb olan iki şey var. Biri odur ki, Gürcüstanın hazırkı hakimiyyəti təəssüf ki, bizim Avropa İttifaqına daxil olmamağımız üçün hər şeyi edir, ona görə də bu gün qütbləşmə hakimiyyətlə Avropa İttifaqına qoşulmaq istəyən Gürcüstanın qalan hissəsi arasındadır. Avropa İttifaqına daxil olmaq istiqamətində bizə konkret tələblər qoyulub və bu tələblər arasında, məsələn, media azadlığı mövzusu var. Cəmiyyəti parçalayan ikinci məsələ siyasiləşmiş ədalətdir. O cümlədən, Gürcüstan Prezidentinə xatırlatmaq istərdim ki, bu gün müstəqil KİV-in, “Mtavari Arxi”nin direktoru Nika Qvaramiya siyasi məhbusdur. Prezidentin ona verdiyi konstitusiya hüququndan istifadə edərək Nika Qvaramiyanı əfv etməsi ölkədə depolarizasiyaya təkan verməklə yanaşı, Avropa İttifaqının tələblərinin yerinə yetirilməsi yolunda konkret irəliləyişə nail olmaq üçün atılan addımlardan biri olardı”, - Samadaşvili bildirib.
