Parlament sədri Rusiyanın Ukraynaya hücumunu və onun regionlarının qanunsuz ilhaqını pislədi
“Müasir dövrün təhlükəsizlik baxımından çətin olduğu bir dövrdə Beynəlxalq Krım Platformasının birinci Parlament Sammitində Ukraynanın dostları və tərəfdaşları qarşısında çıxış etməkdən məmnunam. Bizdən yalnız bir cavab ola bilər: Rusiyanın Ukraynaya hücumunu və onun regionlarının qanunsuz ilhaqını pisləyirik. Rusiya Ukraynanın ərazi bütövlüyünü tanımalı, qoşunlarını işğal etdiyi ərazilərdən çıxarmalı və Ukraynanın müstəqilliyinə hörmət etməlidir".
InterPress.ge xəbər verir ki, bunu Gürcüstan parlamentinin sədri Şalva Papuaşvili Krım Beynəlxalq Platformasının birinci Parlament Sammitində çıxışı zamanı deyib.
Şalva Papuaşvili sammit iştirakçıları qarşısında çıxış edib. Onun sözlərinə görə, gürcü xalqı uzun illər əvvəl Abxaziya və Çxinvali bölgəsində, sonra isə 2008-ci ildə Rusiya işğalının qəddarlığını yaşayıb.
“Fevralın 24-də Ukrayna xalqı bomba yağışına oyandı. Qərbdə çoxları üçün bu gözlənilməz ola bilərdi, amma təəssüf ki, biz gürcülər, moldovalılar və ukraynalılar bunu artıq dəfələrlə yaşamışıq. Gürcü xalqı həm sizin yaxşı bildiyiniz 2008-ci ildə, həm də 1990-cı illərin əvvəllərində Abxaziya və Çxinvali bölgəsində oxşar hücumların qurbanı oldu.
Biz rus tanklarının Gürcüstanın kəndlərini necə məhv etdiyini, rus təyyarələrinin yaxşı gələcəyə olan ümidlərimizi necə bombaladığını gördük. Yüz minlərlə insanın öz ata-baba yurdundan didərgin salınmasının şahidi olduq; Qırğından və etnik təmizləmədən qaçanlar aylarla, illərlə uşaqları və yaxınları ilə birlikdə donmuş divarlara sığınırdılar”, - deyə Şalva Papuaşvili bildirib.
