Kaxa Kaladze: "Rusiyadan Gürcüstana aviareyslərin bərpa edilməsində problem görmürəm"

"Rusiya Gürcüstana birbaşa uçuşlar həyata keçirmək qərarına gəlsə, bunda problem görmürəm".

InterPress.ge xəbər verir ki, bunu Tbilisi meri Kaxa Kaladze deyib.

Onun sözlərinə görə, problem Rusiyada baş verənləri bəyənməyən insanların Gürcüstana daxil olmasında deyil.

“Rusiyadan Gürcüstana birbaşa uçuşlar yoxdur, baxmayaraq ki, Rusiya vətəndaşları adətən buraya gəlirlər. Bundan əlavə, bir çox soydaşlarımız Rusiyanın müxtəlif şəhərlərində yaşayır. Əgər onların tərəfində birbaşa uçuşları bərpa etmək qərarı varsa, mən bunda pis bir şey görmürəm. Rusiyada baş verənləri, Ukraynada baş verənləri bəyənməyən insanların Gürcüstana gəlməsinin nə problemi var? Təkcə Rusiyanın deyil, Belarusun da vətəndaşları gəlirlər. Ən əsası və önəmlisi odur ki, bir milyona qədər vətəndaşımız Rusiyada yaşayır”, - deyə Kaxa Kaladze bildirib.