Gürcüstan yardım üçün Türkiyəyə xilasedicilər və texnika göndərəcək

Gürcüstanın baş naziri İrakli Ğaribaşvilinin qərarına əsasən, Türkiyədə baş vermiş zəlzələ ilə əlaqədar Gürcüstan hökuməti yaxın bir neçə saat ərzində xilasetmə tədbirlərində iştirak etmək üçün müvafiq texnika və xilasedicilər göndərəcək. 

InterPress.ge xəbər verir ki, bu barədə hökumətin mətbuat xidməti məlumat yayıb.

Məlumata görə, Türkiyədə baş vermiş zəlzələnin nəticələri ilə mübarizəyə Gürcüstan Daxili İşlər Nazirliyinin Fövqəladə Halların İdarə Edilməsi Xidmətinin əməkdaşları cəlb olunacaq.

Bu gün səhər saatlarında Türkiyədə güclü zəlzələ baş verib. Son məlumatlara görə, ölkənin 10 əyalətində 284 nəfər ölüb, 2323 nəfər yaralanıb. ABŞ Geoloji Xidmətinin məlumatına görə, zəlzələ 7,8 bal gücündə olub.