Pensiya və sosial müavinətlərlə təmin olunmuş kreditlərin reklamı qadağan edilir

Gürcüstan Milli Bankı kommersiya banklarına pensiya və sosial müavinətlərlə təmin olunmuş kreditlərin reklamını qadağan edir.

InterPress.ge xəbər verir ki, bu barədə Milli Bankın prezidenti vəzifəsini icra edən Natia Turnava məlumat verib.

Onun sözlərinə görə, kommersiya bankları artıq müvafiq göstəriş alıb və bu, etik cəhətdən əsaslandırılmış qərardır.

Turnavanın sözlərinə görə, yuxarıda qeyd olunan reklamın qadağan edilməsi pensiyaçıları və müavinət alanları məlumatsız qərarlar qəbul etməkdən və həddindən artıq borcdan qorumaq imkanı yaradır.

 “Pensiyaçılar, sosial müavinət alan insanlar nisbətən həssas kateqoriyadır. Bizə və bank sisteminə daxil olan şikayətlərin əksəriyyəti ondan ibarətdir ki, onların bir çoxu bəzən bilmədən qərarlar verir - müvafiq məlumatlar sona qədər verilmir. Biz təqaüdçüləri və sosial müavinət alanları artıq borc götürməkdən sığortalayırıq. Borcalanın razılığı və icazəsi ilə kredit götürmək mümkün olacaq”, - Natia Turnava jurnalistlərə bildirib.