Ceyhun Bayramov: Azərbaycan, Gürcüstan və Türkiyə etibarlı tərəfdaşlardır

"Azərbaycan, Gürcüstan və Türkiyə etibarlı tərəfdaşlardır".

InterPress.ge xəbər verir ki, bunu Azərbaycanın xarici işlər naziri Ceyhun Bayramov Bakıda türkiyəli və gürcüstanlı həmkarları ilə üçtərəfli görüşdə çıxışı zamanı bildirib.

“Əməkdaşlığımız regionda təhlükəsizliyin və sabitliyin təmin edilməsində mühüm rol oynayır. Azərbaycan, Gürcüstan və Türkiyə etibarlı tərəfdaşlardır. Bundan əlavə, son illər regionda baş verən tarixi dəyişikliklər Azərbaycanın beynəlxalq səviyyədə tanınmış ərazi bütövlüyünü bərpa etməsinin nəticəsidir”, - deyə Bayramov bildirib.

Azərbaycanın xarici işlər nazirinin sözlərinə görə, regionda yeni reallıq onun potensialından istifadə etmək üçün yeni perspektivlər açır.

Ceyhun Bayramovun qeyd etdiyinə görə, son beş ildə beynəlxalq aləmdə baş verən proseslər üçtərəfli formatın aktuallığını və vacibliyini təsdiqləyir.

“Son üçtərəfli görüşümüzdən sonra həm qlobal, həm də regional miqyasda çox şey dəyişdi. Son beş ildə beynəlxalq aləmdə baş verən proseslər üçtərəfli formatımızın aktuallığını və vacibliyini təsdiqləyir. Təhlükəsizlik, sabitlik və rifah bir sıra çağırışların artan təzyiqi altında olanda regional əməkdaşlıq və inteqrasiyaya getdikcə tələbat artır. Bu unikal format hər üç ölkəyə ümumi maraq kəsb edən sahələrdə əməkdaşlıqdan faydalanmağa imkan verir. Eyni zamanda, əməkdaşlığımız regional və qlobal təhlükəsizlik və sabitliyə töhfə vermək baxımından son dərəcə dəyərlidir. Azərbaycan, Türkiyə və Gürcüstan etibarlı və davamlı tərəfdaşlar və əsl körpü qurucuları kimi geosiyasi qeyri-sabitliyin nəticələrinin yumşaldılması istiqamətində qlobal səylərdə mühüm rol oynayırlar".