Gürcüstan Türkiyəyə yeni avtomobil yolu ilə birləşdiriləcək

Gürcüstan Türkiyə ilə yeni avtomobil yolu ilə birləşdiriləcək.

InterPress.ge xəbər verir ki, dəniz sahilinə bitişik mövcud yol 11,4 kilometr uzunluğunda yeni asfalt-beton yol ilə əvəz olunacaq və bu yol hazırda tikintisi başa çatmaqda olan Batumi dairəvi yoluna Çoroxi çayı üzərində yeni körpü vasitəsilə birləşdiriləcək.

Yeni yolun böyük hissəsi ümumi uzunluğun 67%-ni təşkil edən tuneldən keçəcək ki, bu da hazırda sahil xəttini izləyən yolun uzunluğunu əhəmiyyətli dərəcədə qısaldacaq və hərəkət sürətini artıracaq.

Hazırda Batumi-Sarp yolu layihəsi üzrə ətraf mühitə təsir hesabatına baxılır, ondan sonra layihə üzrə beynəlxalq tenderin elan edilməsi planlaşdırılır.

Əhatə dairəsi üzrə hesabata əsasən, layihə yolunun ümumi uzunluğu 11,4 km-dir. Layihə çərçivəsində yol qovşağı, 3 körpü keçidi və ikizolaqlı tunel, həmçinin Sarp kəndi ərazisində yolda genişləndirmə işləri nəzərdə tutulub.

Eyni zamanda, Batuminin 14 kilometrlik dolama yolu bu il açılmalıdır.