Zaxarova: Rusiya Abxaziya, Gürcüstan və Cənubi Osetiya dövlətləri arasında münasibətlərin normallaşmasında çox maraqlıdır

“Moskva Gürcüstan, Abxaziya və Cənubi Osetiya arasında münasibətlərin normallaşmasında maraqlıdır və ümid edir ki, Tbilisinin mövqeyində müsbət dəyişikliklər gələcək danışıqlarda öz əksini tapacaq və konkret nəticələr verəcək”.

InterPress.ge xəbər verir ki, bu barədə Rusiya Xarici İşlər Nazirliyinin sözçüsü Mariya Zaxarova Moskvada keçirdiyi mətbuat konfransında bildirib.

“Rusiya Cenevrədə keçirilən beynəlxalq danışıqların iştirakçısı və Abxaziya, Gürcüstan və Cənubi Osetiyanın ən yaxın qonşusu kimi bu dövlətlər arasında münasibətlərin normallaşmasında çox maraqlıdır. Moskva bu məsələni həm çoxtərəfli, həm də ikitərəfli formatda tam dəstəkləməyə hazırdır", - Zaxarova qeyd edib.

Onun sözlərinə görə, tərəflərin yanaşmalarında qalan fundamental fərqləri və regionda formalaşmış geosiyasi reallığı nəzərə alsaq, bu məsələlərdən, bu istiqamətdə irəliləyişdən danışmaq hələlik mümkün deyil.

"Lakin Gürcüstanın 2008-ci ilin avqustunda Saakaşvili rejiminin başlatdığı müharibəyə görə Cənubi Osetiya xalqından üzr istəmək niyyəti ilə bağlı son bəyanatları müəyyən ümidlər verir", - Zaxarova qeyd edib.