Parlament Sədri: “Dövlət ağır hava şəraitinə qarşı tam səfərbər olub”

Gürcüstan Parlamentinin sədri Şalva Papuaşvili ölkədə hökm sürən ağır hava şəraiti ilə bağlı açıqlama verib.

InterPress.ge xəbər verir ki, onun sözlərinə görə, dövlət həm fəlakətin qarşısını almaq, həm də yaranan ziyanı aradan qaldırmaq üçün bütün lazımi tədbirləri görür.

Papuaşvili bildirib ki, dövlət tam səfərbər olunub və bütün yaşayış məntəqələrinə giriş yollarının açılması istiqamətində iş aparılır:

“Hava şəraiti çox ağırdır. Proqnozlara görə, qarşıdakı iki gün ərzində qar yağışı davam edəcək. Dövlət tam səfərbər olunub ki, müxtəlif yaşayış məntəqələrinə giriş yolları açıq olsun, rabitə əlaqələri bərpa edilsin və əhali əsas zəruri ehtiyaclarla təmin olunsun.”

O əlavə edib ki, müvafiq dövlət strukturları intensiv şəkildə çalışır:

“Dövlət təbii fəlakətin təsirlərini minimuma endirmək üçün həm qabaqlayıcı, həm də bərpaedici tədbirlər görür. Bütün aidiyyəti qurumlar fəal şəkildə çalışır və vəziyyət tam nəzarət altındadır.”

Xatırladaq ki, son günlər Gürcüstanın müxtəlif bölgələrində güclü qar yağışı, qasırğa və şaxta ciddi problemlərə səbəb olub. Bəzi kəndlər xarici dünyadan təcrid olunub, nəqliyyat və enerji təminatında çətinliklər yaranıb. Dövlət qurumları isə vəziyyətin stabilləşdirilməsi üçün müvafiq tədbirlər həyata keçirirlər.