İrlandiya Gürcüstanın 32 vətəndaşını deportasiya etdi

İrlandiya hökuməti Gürcüstanın 32 vətəndaşını deportasiya edib.

InterPress.ge xəbər verir ki, bu barədə məlumatı İrlandiyanın ədliyyə naziri Jim O’Callaghan və yerli media yayıb.

Nazirin sözlərinə görə, Dublin hava limanından Tbilisiyə xüsusi sifarişlə uçuş təşkil edilib və bu reyslə daha əvvəl deportasiya orderi almış 32 nəfər Gürcüstana göndərilib.

"Dünən gecə mənim departamentimin sifariş etdiyi təyyarə Dublindən Tbilisiyə istiqamətləndi və daha əvvəl deportasiya orderi verilmiş 32 nəfər vətənlərinə qaytarıldı. Təyyarə artıq eniş edib və həmin şəxslər sağ-salamat Gürcüstana çatıb. Bu uçuşun koordinasiyasında iştirak edən İrlandiya Milli Polisi Garda və departamentimin əməkdaşlarına təşəkkür edirəm", – deyə O’Callaghan X (keçmiş Twitter) hesabında paylaşım edib.

Məlumata görə, deportasiya olunan 32 nəfərdən 28-i kişi, 3-ü qadın, 1-i isə uşaqdır.

Jim O’Callaghan bu deportasiyanı "əhəmiyyətli addım" adlandırıb və əlavə edib ki, gələcəkdə daha çox deportasiya reysləri təşkil olunacaq.

Nazirin sözlərinə görə, "ümumilikdə təhlükəsiz ölkələrdən" gələn insanlara xəbərdarlıq edilməlidir ki, onların İrlandiyada sığınacaq almaq ehtimalı çox aşağıdır.

"Əgər siz İrlandiyada sığınacaq axtarırsınızsa – əlbəttə ki, ərizəniz qiymətləndiriləcək – lakin əgər Gürcüstandan gəlmisinizsə, sığınacaq almaq şansınız olduqca azdır", – deyə O’Callaghan vurğulayıb.