Şalva Papuaşvili: “Gürcüstanın müdrik siyasətini qəbul etmək istəmirsinizsə, heç olmasa, susun”

Gürcüstan Parlamentinin sədri Şalva Papuaşvili Ukrayna Prezidenti Volodimir Zelenski və ABŞ Prezidenti Donald Tramp arasında baş tutan görüşə münasibət bildirib.

InterPress.ge xəbər verir ki, o, Gürcüstanın müdrik siyasətinin beynəlxalq səviyyədə qəbul edilməməsini və ölkə daxilindəki müxalifətin Qərbdən maliyyələşən təşkilatlarla birgə apardığı kampaniyanı sərt tənqid edib.

“Bu müharibənin açar oyunçusu ABŞ-dır”

Papuaşvili qeyd edib ki, Rusiyanın Ukraynaya hücumundan üç il keçsə də, Avropa liderlərinin hələ də bu müharibəni necə bitirəcəkləri barədə konkret planları yoxdur:

“Ukrayna Rusiyanı necə məğlub edəcək? Bu qələbə üçün nə qədər resurs, vaxt və insan həyatı lazım olacaq? - bu suallar cavabsızdır. Biz yalnız eşidirik ki, yardım davam edəcək.”

O əlavə edib ki, ABŞ-ın yeni administrasiyası müharibəni bitirəcəyinə dair qətiyyətli vəd verib:

“ABŞ bu prosesdən çıxsa, Avropa və Ukrayna Rusiyanın qarşısında tək qalacaq.”

“Gürcüstanın düzgün qərarı - müharibəyə qarışmamaq”

Papuaşvili vurğulayıb ki, Gürcüstan hökuməti üç il əvvəl bu müharibənin onların ölkəsinə təsir edəcəyini əvvəlcədən görüb və ən düzgün qərarı verib – münaqişəyə heç bir şəkildə qarışmamaq:

“Biz bu müharibənin birbaşa və ya dolayı yolla iştirakçısı olmamalıyıq və hər bir qiymətə sülhü qorumalıyıq.”

O əlavə edib ki, Gürcüstan Ukraynanı dəstəkləsə də, bu münaqişəni daha da alovlandıracaq addımlardan çəkinib:

“Biz Rusiya təcavüzünü pislədik, Ukraynaya dəstək verdik, qaçqınları qəbul etdik, humanitar yardım göndərdik və Gürcüstanın Kiyevdəki səfirliyi şəhərdə qalan son diplomatik missiya oldu.”

 

Lakin Gürcüstan Rusiyaya qarşı sanksiyalara qoşulmadı, müharibəyə könüllülər göndərmədi və ritorikasını gərginləşdirmədi:

“Gördüyümüz kimi, dünən Ağ Evdə baş verənlər ritorikanın nə qədər mühüm olduğunu bir daha göstərdi.”

 

“Müxalifət müharibəni şouya çevirməkdə davam edir”

 

Papuaşvili Gürcüstanın müxalif qüvvələrini, Qərbdən maliyyələşən qeyri-hökumət təşkilatlarını və eks-prezident Saakaşvilini “yüngül düşüncəlilikdə” günahlandırıb:

“Bu insanlar üç il əvvəl sosial şəbəkələrdə müharibəni şouya çevirənlər idi. Bugün də bunu edirlər.”

 

O bildirib ki, beynəlxalq səviyyədə bəzi diplomatlar məhz belə zəif və idarəolunan müxalifətin hakimiyyətə gəlməsini istəyir:

“Gürcüstan hökumətini üç il əvvəl öz istədiklərinə uyğun yönləndirə bilmədilər, amma indi bu bacarıqsızları idarə etmək daha asan olar.”

 

Papuaşvili Gürcüstan hökumətinin Qərbin və müxalifətin təzyiqlərinə baxmayaraq, ölkənin maraqlarını qorumaq üçün düzgün qərar verdiyini bildirib və müharibəyə qoşulmamaq strategiyasını müdafiə edib.