Zurabişvili: Aİ bir il əvvəl namizəd statusu verdiyi ölkənin totalitar diktaturaya çevrilməsinə yol verməməlidir!

"Avropa İttifaqı bir il əvvəl namizəd statusu verdiyi ölkənin bir il ərzində totalitar diktatura nümunəsinə çevrilməsinə imkan verməməlidir."

InterPress.ge xəbər verir ki, bu barədə Gürcüstanın beşinci prezidenti Salome Zurabişvili Parisdə keçirilən “Demokratiya naminə görüş” tədbirində çıxışı zamanı bildirib.

Zurabişvili çıxışı zamanı Rusiya təhlükəsi, onun strategiyası və hibrid təsirləri barədə danışaraq bildirib ki, Rusiya Gürcüstanda ən incə seçki manipulyasiyasını həyata keçirib: “Rusiya öz marionetləri və oliqarxları vasitəsilə dövlət hakimiyyətini demək olar ki, tam ələ keçirib.”

O, Avropalıları xəbərdar edib ki, Rusiyanın hibrid strategiyası hamıya təhlükə yaradır və bu, həm Avropa İttifaqı, həm də geosiyasi baxımdan ciddi çağırışdır.

Ukraynada Rusiyanın apardığı müharibəyə toxunan Zurabişvili qeyd edib ki, Gürcüstan və Ukraynanın oxşar təcrübələri var və bu səbəbdən Rusiyanın əsl mahiyyətini yaxşı bilirlər. Onun sözlərinə görə, Rusiyanın “normal dövlət” kimi təqdim olunması arzusu vaxtaşırı ortaya çıxsa da, bu, reallığa uyğun deyil.

Zurabişvili çıxışında deyib:

“Əvvəlcə Fransaya təşəkkür edirəm ki, demokratiya və azadlıq uğrunda qlobal mübarizənin ön cəbhəsində dayanır. Az əvvəl Ukraynadan gələn səsi eşitdiniz. Gürcüstanın səsi ondan çox da fərqlənmir, hərçənd biz bu dəhşətli müharibənin birbaşa içində deyilik. Lakin bizim Ukrayna ilə ortaq təcrübəmiz var və bu təcrübəyə əsasən çox yaxşı bilirik ki, Rusiya əslində nədir.

2008-ci ildə Gürcüstana qarşı baş vermiş rus təcavüzü, 2014-cü ildə Krımın ilhaqı və 2022-ci ildən bu günə qədər davam edən genişmiqyaslı müharibə – bunlar hamısı bir-birinin davamıdır. Ukraynada Rusiya uğur qazana bilmədi. Putin üç günə Kiyevi almaq istəsə də, məqsədinə nail olmadı. Rusiya nə hərbi, nə də strateji baxımdan uğur əldə etdi. Onun nüfuzu zədələndi, iqtisadi itkilərlə üzləşdi, hərbi liderlərini tez-tez dəyişməli oldu, hətta koreyalıları cəlb etmək məcburiyyətində qaldı – bu, qalibiyyət deyil. Rusiya qalib gəlmir və anlayır ki, Avropa özünü qorumaq üçün yenidən silahlanmalıdır.

Hazırda Rusiya yeni bir strategiya axtarır: daha az xərc tələb edən, daha az birbaşa hücumlarla müşayiət olunan hibrid strategiya. Gürcüstan bu strategiyanın sınaq meydanıdır. Burada Rusiya öz marionetləri və oliqarxları vasitəsilə dövlət hakimiyyətini ələ keçirdi. Öz təbliğatını yaymağa nail oldu. Təəssüf ki, bu təbliğat müəyyən dərəcədə uğur qazandı. Bu, Rusiyanın yeni və daha ucuz strategiyasıdır. Mən buraya sizi xəbərdar etməyə gəlmişəm – bu hibrid strategiya hamıya təhlükədir. Bu, bu gün Gürcüstanın faciəsi kimi yaşanır.

Lakin Gürcüstan gəncliyi artıq 140 gündür küçələrdədir və meydanı tərk etmir. Onlar da Ukrayna səngərlərində döyüşən gənclər kimi öz mübarizələrini davam etdirirlər. Biz də öz yolumuzla müqavimət göstəririk və göstərəcəyik. Mən də sonadək bu xalqın prezidenti olacağam!

Bu, təkcə Gürcüstanın yox, hamımızın çağırışıdır. Bu, bütün demokratiyalar üçün bir təhlükədir. Sovet İttifaqından çıxmış və inkişaf edən bütün demokratiyalar – Moldova, Ukrayna və digərləri – bu təhlükə ilə üz-üzədir. Rumıniyada və Moldovada bu yöndə cəhdlər gördük. Ukraynada demokratik seçkilərlə bağlı deyilənlər – Putin tərəfindən səsləndirilən fikirlər – əslində həmin yeni hibrid strategiyanın müharibədən sonra orada tətbiqinə hazırlıqdır. Buna qarşı durmalıyıq!

Bu, geosiyasi çağırışdır. Gürcüstanın itirilməsi – və bu baş verməyəcək – əhəmiyyətsiz ola bilməz. Bu, Qara dəniz, Qafqaz, Avropa yönümlü Ermənistanın taleyi, Orta Asiyaya gedən yol deməkdir. Bu region sizi maraqlandırmalıdır. Lakin hər şeydən əvvəl bu, Avropa İttifaqı üçün bir çağırışdır.

Avropa İttifaqı bir il əvvəl namizəd statusu verdiyi ölkənin bir il sonra totalitar diktaturanın nümunəsinə çevrilməsinə yol verməməlidir. Avropa İttifaqı buna qarşı qərar vermək üçün alətlərə sahib olmalı, ardıcıl siyasət yürütməli və bu mesajı verməyi bacarmalıdır. Bu qərarlar bir-iki dövlətin əlində olmamalıdır – xüsusən totalitarizm yoluna qədəm qoymuş ölkələrin.

Biz totalitarizmə qarşı demokratiyanı hər yerdə qorumalıyıq. Bu, Avropa institutları, Avropanın hərbi güclənməsi, lakin eyni zamanda mənəvi və siyasi güclənmədir. Bu, birgə qərarlar qəbul etmək imkanıdır.

Fransa – demokratiyanın beşiyi və azadlığın vətəni – bu yolda ön cəbhədədir və biz həmişə onunla bir yerdə olacağıq. Bu belə də qalacaq, istər indiki çətinliklər olsun, istərsə də gələcəkdə. Totalitarizmə qarşı müqavimət göstərin!” – deyə Salome Zurabişvili tədbir iştirakçılarına müraciət edib.