Gürcüstanda Çin dili ikinci xarici dil kimi tədris olunacaq
Gürcüstan Təhsil, Elm və Gənclər Nazirliyi məktəblərdə Çin dilinin ikinci xarici dil kimi tədrisini nəzərdə tutan yeni yanaşma təqdim edib.
InterPress.ge xəbər verir ki, qurumun məlumatına görə, Çin dili üzrə yeni standart təsdiqlənəcək və bu istiqamətdə tədris resurslarının hazırlanmasına başlanılacaq.
Nazir Aleksandre Tsulukiani yeni ümumi təhsil baxışını məktəb ictimaiyyəti və maraqlı tərəflərlə paylaşarkən bir sıra yenilikləri açıqlayıb. Humanitar istiqamətin gücləndirilməsi məqsədilə, ədəbiyyatdan ayrı olaraq, Gürcü dili üçün müstəqil standart təsdiqlənəcək. Bu, şagirdlərdə ana dili biliklərinin daha da dərinləşdirilməsinə xidmət edəcək.
Yeni baxışda əsas diqqət tədrisin keyfiyyətinin artırılmasına, müəllimlərin peşəkar inkişafı və karyera artımı sisteminin yenilənməsinə, sağlam və inkişaf etmiş məktəb mühitinin yaradılmasına yönəlib. STEAM sahəsinin inkişafı xüsusi vurğulanıb – bütün səviyyələrdə kompüter texnologiyalarının tədrisi, məktəblərin laboratoriyalarla təchizi, STEAM klublarının və olimpiadaların təşviqi planlaşdırılır.
Bundan əlavə, fizika-riyaziyyat məktəblərinin intellektual potensialından digər məktəblərdə bu fənlərin tədrisinin yaxşılaşdırılması üçün istifadə ediləcək.
Biliklərin dərinləşdirilməsi və bilinqval təhsilin əlçatanlığının artırılması da vacib hədəflər sırasındadır. Bu təşəbbüslər gənclərdə milli və vətənpərvər dəyərlərin inkişafını gücləndirməyi hədəfləyir.
Yeni modelə əsasən, orta təhsil pilləsində şagirdlər iki istiqamətdən birini seçə biləcəklər: ya akademik sahədə dərsləri intensiv davam etdirmək, ya da peşə təhsilinə yönəlib attestatla yanaşı peşə diplomu almaq imkanı olacaq.
Bütün dərsliklər yeni fənn standartlarına uyğun yenilənəcək. Bu prosesdə mütəxəssislər, müəllimlər, psixoloqlar, valideynlər və digər maraqlı tərəflər fəal iştirak edəcək.
Bundan başqa, təhsil prosesinin rəqəmsallaşdırılması təşviq ediləcək – elektron gündəliklər, idarəetmə sistemləri və müəllimlərin inkişafına dəstək platformaları inkişaf etdiriləcək.
Müəllimlərin karyera artımı ilə bağlı yeni sistem yay aylarında ictimaiyyətə təqdim ediləcək. Təhsil Nazirliyi eyni zamanda məktəb mühitinin sağlamlaşdırılması, şagirdlərin psixososial rifahı və sağlam həyat tərzinin təşviqi məqsədilə idman infrastrukturunun inkişafı ilə bağlı da fəaliyyətlərini davam etdirəcək.
