Giorgi Vaşadze: “İvanişvili, sən bu xalqın düşmənisən! Heç kim səndən qorxmur!”

“İvanişvili, sən bu xalqın düşmənisən! Heç kim səndən qorxmur!”

InterPress.ge xəbər verir ki, bu sözləri “Strategiya Aqmaşenebeli” partiyasının lideri Giorgi Vaşadze ona qarşı çıxarılan məhkəmə hökmünə cavab olaraq keçirdiyi brifinqdə deyib.

O, Bidzina İvanişviliyə birbaşa müraciət edərək, onu xalqın düşməni adlandırıb.

“Məğlubiyyətə məhkum edilmiş rejim qərar çıxardı, amma deyirəm ki, bizim həbsimiz bu ölkədə baş verən ədalətsizliklə müqayisədə heç nədir. Gənclər həbsdədir, qadınlar həbsdədir, amma əsas odur ki, biz mübarizəmizi davam etdiririk. Bu qərar bizim mövqeyimizin düzgünlüyünü daha da sübut edir”, – deyə Vaşadze bildirib.

O, qeyd edib ki, çox sayda vətənpərvər bu yoldan keçib və qələbə gözləniləndən tez gələcək:

“İvanişvili, sən bu ölkənin düşmənisən! Sən istədiyin təkcə mən və digər siyasi rəqiblər deyil, bütün ölkəni həbsə atmaqdır – amma bu, baş tutmayacaq! Gürcü xalqı bu mübarizədə qalib gələcək. Nə sən, nə Kobaxidze, nə də ətrafındakı digər adamlar bizi sındıra bilməzsiniz! Düşünürsən ki, bizi həbslə qorxudacaqsan? Səndən heç kim qorxmur! Sən və sənin çevrəndəki hər kəs bir heçsiniz! Küçəyə çıxmaqdan, insanların gözünün içinə baxmaqdan qorxursunuz!”

Vaşadze İvanişvilinin hökumətini “polis rejimi” adlandıraraq, onun heç bir sosial və ya iqtisadi uğur əldə etmədiyini deyib:

“Bu ölkəyə nə verdiniz? Avropa perspektivimizi hara itirdiniz? Gürcüstan nə vaxtsa islahatlarla nümunə göstərən ölkə idi – indi nə vəziyyətdəyik? Neçə iş yeri yaratdınız? Tək uğurunuz – siyasi və vicdan məhbusları ilə həbsxanaları doldurmaqdır”.

Sonda Vaşadze ictimaiyyətə çağırış edib: “Birlik, birlik və yenə birlik! Yalnız birgə mübarizə ilə biz qələbəni tezləşdirə bilərik!”

Xatırladaq ki, Giorgi Vaşadze Gürcüstan parlamentinin müvəqqəti istintaq komissiyasının çağırışına əməl etmədiyinə görə məhkəmə tərəfindən 7 ay müddətinə azadlıqdan məhrum edilib və 2 il müddətinə vəzifə tutmaq hüququndan məhrum olunub. Məhkəmə prosesində Vaşadze iştirak etməyib.