Kaxa Kaladze: “Qanunu pozmaq siyasi statusla əsaslandırıla bilməz”

Qanunu pozan istənilən şəxs, o cümlədən siyasətçilər, qanun qarşısında cavabdeh olmalıdırlar.

InterPress.ge xəbər verir ki, bu barədə “Gürcü Arzusu”nun baş katibi, Tbilisi meri Kaxa Kaladze bəyan edib.

O, bu fikirləri parlamentin müvəqqəti istintaq komissiyasının çağırışına məhəl qoymayan və nəticədə azadlıqdan məhrum edilən bir neçə müxalif liderlə bağlı çıxışında səsləndirib.

“Kimliyindən asılı olmayaraq, heç kimin qanun pozmasına göz yumulmamalıdır. Siyasi status kimsəyə üstünlük vermir. Əksinə, siyasətçilər cəmiyyət qarşısında daha çox məsuliyyət daşıyırlar. Hər kəs konstitusiyaya və qanunlara hörmət etməlidir. Əgər bu prinsiplər pozulursa, dövlət tərəfindən adekvat reaksiya verilməsi tamamilə normaldır,” – deyə Kaladze vurğulayıb.

Onun sözlərinə görə, dövlətin və cəmiyyətin əsas meyarı qanunun aliliyidir, fərdi siyasətçilərin nəyi qəbul edib-etməməsi isə əhəmiyyət daşımır.

“Bu insanlar nəyi etiraf edir və ya nəyi qəbul etmir – bu, mənim üçün önəmli deyil və əminəm ki, mənim komanda yoldaşlarım üçün də deyil. Əsas odur ki, Gürcüstan vətəndaşlarının əksəriyyəti “Gürcü Arzusu”nu dəstəkləyir,” – deyə o əlavə edib.

Kaladze həmçinin müxalifəti xaricdən idarə olunmaqda ittiham edib və onların fikirlərinin və davranışlarının mühüm əhəmiyyət daşımadığını bildirib.