Daxili İşlər Nazirliyi bəyanat yaydı

Daxili İşlər Nazirliyi bu il sentyabrın 8-9-da Tbilisi şəhərinin Melikişvili prospektində baş vermiş hadisələrlə bağlı aparılan araşdırmalar çərçivəsində 3 nəfəri saxlayıb.

InterPress.ge xəbər verir ki, Daxili İşlər Nazirliyi bununla bağlı bəyanat yayıb.

Qurumun məlumatına görə, dəstə zorakılığı ittihamı ilə aşağıdakı şəxslər saxlanılıb: 1965-ci il təvəllüdlü Z.M. və 2003-cü il təvəllüdlü İ.B., 2002-ci il təvəllüdlü İ.D. isə əmlaka ziyan vurmaq və ya məhv etmək ittihamı ilə saxlanılıb.

"İstintaqın əldə etdiyi sübutlarla müəyyən edilib ki, saxlanılan şəxslər, Z.M. və İ.B. sentyabrın 8-də Melikişvili prospektində davam edən etiraz aksiyası zamanı aksiya iştirakçılarına fiziki təzyiq göstərib. İ.D.-yə gəlincə, o, Melikişvili prospektində “Gürcü arzusu – Demokratik Gürcüstan” partiyasının Tbilisi merliyinə namizədinin seçki pankartını zədələyib.

Daxili İşlər Nazirliyi hadisələrdə iştirak edən bütün şəxsləri istintaqla əməkdaşlığa və çağırış əsasında Daxili İşlər Nazirliyinin müvafiq bölməsinə gəlməyə çağırır. Faktla bağlı Cinayət Məcəlləsinin 126-cı maddəsinin 1-ci hissəsi, 162-ci və 187-ci maddələri ilə istintaq aparılır.

Bundan başqa, Daxili İşlər Nazirliyi baş vermiş cinayət əməllərində iştirak edən digər şəxslərin müəyyən edilərək məsuliyyətə cəlb edilməsi istiqamətində intensiv istintaq-əməliyyat tədbirləri davam etdirir. Hər bir qanun pozuntusu faktına polis tərəfindən müvafiq hüquqi cavab veriləcək", - məlumatda deyilir.