İrakli Kobaxidze: Siyasətimizin əsas prinsipi vətəndaşlara maksimum qayğı göstərmək və rahat xidmətlə təmin etməkdir
"Siyasətimizin əsas prinsipi ondan ibarətdir ki, vətəndaşlarımıza maksimum qayğı göstərməliyik, onları rahat xidmət ilə təmin etməliyik. Ədliyyə Evi bu baxımdan görkəmli layihədir"
InterPress.ge xəbər verir ki, bunu Gürcüstanın baş naziri İrakli Kobaxidze Qldani Ədliyyə Evinin açılışında çıxışı zamanı deyib.
Baş nazirin sözlərinə görə, Qldani sakinləri bilavasitə öz rayonunda 500-dən çox xidmət alacaqlar.
"Hər kəsi, xüsusən də Qldani sakinlərini Ədliyyə Evinin açılışı münasibətilə təbrik etmək istərdim. Bundan sonra Qldani sakinləri bilavasitə öz bölgələrində 500-dən çox xidmət alacaqlar və bu, bu rayon sakinləri üçün rahat şəraitdə təmin ediləcək. Bizim siyasətimizin əsas prinsipi ondan ibarətdir ki, biz vətəndaşlara maksimum qayğı ilə yanaşmalıyıq və onları komfortlu xidmətlər ilə təmin etməliyik.
Qldani filialı Ədliyyə Evləri sisteminin bir hissəsidir və bu gün ölkə üzrə 125 ünvanda gündəlik 20 mindən çox insana xidmət göstərir. Xatırlatmaq istərdim ki, 2012-ci ildə ölkə üzrə cəmi 11 Ədliyyə Evi fəaliyyət göstərirdi", - Baş nazir bildirib.
Hökumət başçısının sözlərinə görə, bu layihə çərçivəsində yeni iş yerlərinin açılması böyük əhəmiyyət kəsb edir.
"Konkret olaraq, Qldani Ədliyyə Evində yüzə yaxın həmvətənimiz işlə təmin olunacaq. Bu layihələrin əlillər üçün uyğunlaşdırılması da vacibdir və Qldani Ədliyyə Evi də bu baxımdan istisna deyil.
Biz bununla kifayətlənmirik. Ədliyyə Evləri şəbəkəsinin daha da genişləndirilməsi Gürcüstanın bütün bələdiyyələri əhatə olunana qədər davam edir. Bu şəbəkə Tbilisidə də genişləndirilməlidir. Diğumidə Ədliyyə Evinin tikintisinə çox yaxın vaxtlarda başlanacaq. Hökumət gələcəkdə bu istiqamətdə səylərini əsirgəməyəcək. Nazir cənab Paata Saliyə və onun komandasının hər birinə, Ədliyyə Nazirliyinin hər bir rəhbərinə və əməkdaşına şəxsən təşəkkür etmək və təbrik etmək istəyirəm", - baş nazir bildirib.
Məlumatı Gürcüstan hökumətinin administrasiyası yayıb.
