“Təbii ki, hakimiyyətlə danışmağa çalışıram” – Aİ-nin Gürcüstandakı səfiri Pavel Herçinski

Avropa İttifaqının Gürcüstandakı səfiri Pavel Herçinski bildirib ki, o, hökumətlə dialoqun saxlanması üçün daim səy göstərir. Onun sözlərinə görə, Aİ-nin səfirinin vəzifəsi bütün tərəflərlə — həm hökumətlə, həm də müxalifət və vətəndaş cəmiyyəti ilə açıq ünsiyyət kanallarına malik olmaqdır.

“Əlbəttə ki, hakimiyyətlə danışmağa çalışıram. Biz həmçinin müxalifətlə və vətəndaş cəmiyyəti ilə də əlaqədəyik. Bu, tam olaraq bir həftə əvvəl Avropa Komissiyasının dərc etdiyi genişlənmə hesabatında da aydın şəkildə görünür. Gürcüstanın Aİ-yə üzvlük istiqamətində səylərinə gəlincə, bu hesabat dağıdıcı xarakter daşıyır. Sənəddə açıq yazılıb ki, Gürcüstan indi iki il əvvəl, namizəd statusu aldığı dövrdən daha uzaq mövqedədir. İndi bu kursun dəyişdirilməsi və Avropa inteqrasiyasına qayıdılması Gürcüstan hökumətindən asılıdır,” – deyə Herçinski vurğulayıb.

Diplomat həmçinin Gürcüstan hökumətinin bəyanatına cavab verib ki, guya ölkənin Aİ-yə üzvlük prosesi Tbilisi tərəfindən deyil, Brüssel tərəfindən dayandırılıb.

“Gürcüstan hökuməti 2022-ci ilin martında Aİ-yə üzvlük müraciəti təqdim etmək qərarını özü qəbul etdi. Elə Avropa İttifaqı da 2023-cü ilin dekabrında Gürcüstana namizəd statusu verdi. Hansı qanunları qəbul edəcəyi Gürcüstanın daxili işidir, lakin mənim və Aİ-nin vəzifəmiz gürcü ictimaiyyətinə bildirməkdir ki, hansı qanunlar Avropa standartlarına uyğun gəlmir. 2024-cü ilin yazında biz açıq şəkildə xəbərdarlıq etdik ki, “xarici agentlər haqqında” qanun qəbul edilməməlidir, çünki bu, nəticələrə gətirib çıxaracaq. Həqiqətən də, həmin ilin iyununda Gürcüstan parlamenti bu qanunu qəbul etdikdən sonra Avropa Şurası ölkənin üzvlük prosesini de-fakto dayandırmaq qərarına gəldi və hökumətə kursu dəyişməyi tövsiyə etdi. Mən sevinirəm ki, nəhayət, bəzi gürcü deputatlar Avropa Şurasının iyun qərarlarına diqqət yetirdilər, amma təəssüf ki, onların bunun mənasını dərk etməsi üçün 18 ay lazım gəldi,” – deyə səfir qeyd edib.

Herçinskinin sözlərinə görə, Avropa Şurasının 2024-cü ilin iyun qərarları “ilk oyanış zəngi” idi, son həftə açıqlanan genişlənmə hesabatı isə “artıq son xəbərdarlıqdır”.

“Hesabat dağıdıcıdır. Ümid edirəm ki, gürcü deputatların bu dəfə məsələni öyrənib hərəkətə keçməsi üçün 18 aydan az vaxt lazım olacaq. Əgər Gürcüstan və onun hökuməti doğrudan da Aİ-yə üzvlük məsələsinə ciddi yanaşırsa, o zaman kursu dərhal dəyişməli və Avropa inteqrasiyası yoluna qayıtmalıdır,” – deyə Pavel Herçinski bildirib.