Tip 1 şəkərli diabetli uşaqlar artıq Libre 2+ davamlı qlükoza monitorinq sistemi ilə təmin olunacaqlar

Tip 1 şəkərli diabet diaqnozu olan uşaqlar qanda qlükozanın davamlı monitorinqinə imkan verən Libre 2+ sistemi ilə təmin ediləcək.

InterPress.ge xəbər verir ki, bu barədə məlumatı Gürcüstanın Səhiyyə Nazirliyi yayıb.

Nazirliyin açıqlamasına görə, tip 1 diabetli uşaqların ehtiyaclarını və valideynlərin maraqlarını nəzərə alaraq, Səhiyyə Nazirliyi sensor istehsalçısı Abbott Laboratories şirkəti ilə razılığa gəlib və Libre 2+ monitorinq sistemi alınıb. Sensorlardan istifadə ehtiyacı olan xəstələr bu cihazları mərhələli şəkildə əldə edəcəklər.

Cihazların verilməsi üçün müraciətlərin qəbulu artıq başlayıb və paylanma mərhələli şəkildə həyata keçiriləcək.

Səhiyyə naziri Mixeil Sarcveladze kriteriyaların müəyyənləşdirilməsi məqsədilə sahə üzrə mütəxəssis həkimlərlə görüş keçirib. Görüşdə Libre 2+ sistemindən istifadənin tibbi zəruriliyini müəyyən edən klinik göstəricilər müzakirə olunub.

Libre 2+ davamlı qlükoza monitorinq sistemi iki hissədən ibarətdir: sensor və oxuyucu cihaz. Sensor 15 gün fəaliyyət göstərir, oxuyucu isə məlumatları 90 gün ərzində yadda saxlayır.

Dövlət proqramının benefisiarları üçün ABŞ şirkəti tərəfindən xüsusi qaynar xətt yaradılıb. Texniki dəstək və ya nasazlıq hallarında aşağıdakı nömrə ilə əlaqə saxlamaq mümkündür:

📞 +995 800 00 80 77 (iş günləri, saat 09:00–17:00).

Xatırladaq ki, tip 1 şəkərli diabeti olan uşaqlara 2022-ci ildən etibarən Amerika-İrlandiya şirkəti Medtronic-in davamlı qlükoza monitorinqinin yüksək texnoloji sistemləri də təqdim olunur.