Şalva Papuaşvili: “Bu gün Gürcüstanda xaricdən idarə olunan siyasi marionetlər fəaliyyət göstərir”

Gürcüstan parlamentinin sədri Şalva Papuaşvili “Prime Time” tərəfindən yayımlanmış sənədə münasibət bildirib. Nəşrin məlumatına görə, həmin sənəd yerli müxalifətə Brüsseldəki Aİ rəsmiləri tərəfindən göndərilib və müxalifət nümayəndəsi onu brifinqdə oxuyub.

Papuaşvilinin sözlərinə görə, bu fakt bir daha təsdiqləyir ki, radikalizm Gürcüstanda hansı səviyyədə idarə olunur.

“Bu, xaricdən gündəlik proseslərin birbaşa idarə olunmasıdır. Hər bir söz əvvəlcədən diktə edilir, hər addım öncədən hesablanır. Bu gün radikal müxalifət və xaricdən maliyyələşdirilən QHT-lər belə fəaliyyət göstərir. Təbii ki, bu, utancverici faktdır və vəziyyətin mahiyyətini açıq şəkildə göstərir.

21-ci əsrin Gürcüstanında, müstəqilliyin bərpasından 35 il sonra, bizdə gürcü soyadı və pasportu daşıyan, lakin xaricdən idarə olunan və öz ölkəsinə zərər vurmağa çalışan adi marionetlər var. Cəmiyyət bu qrupa elə də baxmalıdır – onların yeganə məqsədi ölkəmizi başqalarının idarəsinə təhvil verməkdir”, – deyə Şalva Papuaşvili bildirib.