Polis Tbilisidə qanunsuz odlu silah və sursat müsadirə edib - bir nəfər saxlanılıb

Daxili İşlər Nazirliyinin Patrul Polis Departamentinin Tbilisi Baş İdarəsinin əməkdaşları 1975-ci il təvəllüdlü, əvvəllər məhkum edilmiş K.O.-nu qanunsuz odlu silah və döyüş sursatının əldə edilməsi, saxlanılması və daşınması ittihamı ilə saxlayıblar.

InterPress.ge xəbər verir ki, bu barədə Daxili İşlər Nazirliyi məlumat yayıb.

Polis əməkdaşları Tbilisidə saxlanılan şəxsin idarəsində olan avtomobildən, eləcə də onun yaşayış mənzilinə keçirilmiş axtarış zamanı bir neçə odlu silah, döyüş patronları və daraqları maddi sübut kimi götürüblər.

Faktla bağlı istintaq Gürcüstan Cinayət Məcəlləsinin 236-cı maddəsinin 3-cü və 4-cü hissələri ilə aparılır. Bu maddə 7 ilədək azadlıqdan məhrumetmə cəzasını nəzərdə tutur.