Serbiyada nazirə və daha üç şəxsə Trampın kürəkəni ilə bağlı layihə üzrə korrupsiya ittihamı irəli sürülüb
Serbiyanın Mütəşəkkil Cinayətkarlıq üzrə Prokurorluğu bir nazir və daha üç şəxsə vəzifə səlahiyyətlərindən sui-istifadə və ABŞ prezidenti Donald Trampın kürəkəni Cared Kuşnerlə əlaqəli dəbdəbəli daşınmaz əmlak layihəsinə dair sənədlərin saxtalaşdırılması ittihamları ilə cinayət işi başlanmasını təklif edib.
InterPress.ge xəbər verir ki, bu barədə ABC News məlumat yayıb.
Prokurorluğun rəsmi saytında dərc olunan açıqlamaya görə, mədəniyyət naziri Nikola Selakoviç — avtoritar prezident Aleksandr Vuçiçin yaxın müttəfiqi — və daha üç vəzifəli şəxs barəsində cinayət məsuliyyətinə cəlb olunma təşəbbüsü irəli sürülüb. İstintaq Belqradın mərkəzində NATO tərəfindən bombalanmış, qorunan mədəni irs zonası olan hərbi kompleks ətrafındakı mübahisəyə fokuslanıb. Sözügedən ərazinin hazırda dəbdəbəli kompleksə çevrilməsi planlaşdırılır.
Məlumata görə, ötən il Serbiya hökuməti Kuşnerlə əlaqəli Affinity Global Development şirkəti ilə ABŞ-da 99 illik icarə müqaviləsi bağlayıb. Kuşner şirkətinin təxminən 500 milyon dollar dəyərində layihəni maliyyələşdirməyi planlaşdırdığını təsdiqləyib. Layihə çərçivəsində hündürmərtəbəli otel, lüks yaşayış kompleksi, ofis sahələri və mağazaların tikintisi nəzərdə tutulurdu.
Nəşrin yazdığına görə, Selakoviç və digər şəxslər abidənin qorunan statusunu sənədləri saxtalaşdırmaqla qanunsuz şəkildə ləğv etmiş ola bilərlər. Belqradın mərkəzində NATO bombardmanı olan ərazidə hündürmərtəbəli otel, ofislər və mağazaların inşasını Vuçiç hökuməti dəstəkləsə də, təşəbbüs həm ölkə daxilində, həm də beynəlxalq ekspertlər və Serbiya ictimaiyyəti tərəfindən ciddi etirazlarla qarşılanıb.
Sonradan məlum olub ki, Cared Kuşner Tramp brendi ilə planlaşdırılan daşınmaz əmlak razılaşmasında iştirak etməyəcək. The New York Times yazır ki, bu açıqlama Serbiya prokurorlarının təxminən yarım milyard dollar dəyərində layihə ilə bağlı korrupsiya işi üzrə dörd şəxsə ittiham irəli sürməsindən sonra verilib.
Kuşnerin Affinity Partners şirkətinin nümayəndəsi bildirib ki, şirkət əməkdaşlıqdan ona görə geri çəkilir ki, “əhəmiyyətli layihələr cəmiyyəti bölməməli, birləşdirməlidir” və bu qərar Serbiya xalqına və Belqrad şəhərinə hörmət əlamətidir.
