Kobaxidze: Eagle Hills layihəsi iqtisadiyyata ildə 11 milyard lari qazandıracaq

"Eagle Hills-in investisiya layihəsi hər il Gürcüstan iqtisadiyyatına 11 milyard lari əlavə edəcək."

InterPress.ge xəbər verir ki, bu barədə Gürcüstanın baş naziri İrakli Kobaxidze Abu-Dabidə jurnalistlərə açıqlamasında bildirib.

Baş nazirin sözlərinə görə, 10 il ərzində illik hesabla ölkə büdcəsinə 700 milyon lari daxil olacaq. O vurğulayıb ki, söhbət yalnız bir investisiya layihəsindən gedir və bu layihə ölkənin inkişafına hər hansı mənfi faktor olmadan mühüm töhfə verir.

İrakli Kobaxidze qeyd edib ki, layihənin icrası mərhələsində 24 min müvəqqəti iş yeri yaradılacaq, layihə tamamlandıqdan sonra isə 8 min daimi iş yeri fəaliyyətə başlayacaq. Onun sözlərinə görə, belə böyük iqtisadi və sosial effekt nəzərə alınaraq, dövlət layihənin uğurla həyata keçirilməsinə tam məsuliyyət götürür.

Baş nazir eyni zamanda Birləşmiş Ərəb Əmirliklərinə səfərini yüksək qiymətləndirərək bildirib ki, bu, Gürcüstan üçün gələcəkdə konkret nəticələr verəcək maraqlı və məhsuldar səfər olub. O qeyd edib ki, səfər çərçivəsində dünyaca məşhur iri şirkətlərin nümayəndələri ilə görüşlər keçirilib və yeni investisiya imkanları müzakirə olunub.

Kobaxidzenin sözlərinə görə, DAMAC şirkəti ilə əməkdaşlığın genişləndirilməsi, eləcə də “Abu Dhabi Ports” ilə Tbilisi Quru Limanı layihəsinin ikinci mərhələsinin icrası məsələləri diqqət mərkəzində olub. Baş nazir həmçinin BƏƏ Prezidenti ilə görüşdüyünü və onun Gürcüstana bütün istiqamətlər üzrə tam dəstək vəd etdiyini bildirib.

İrakli Kobaxidze vurğulayıb ki, səfər zamanı keçirilən görüşlər və aparılan danışıqlar ölkənin enerji və regional bağlantı layihələri baxımından xüsusi əhəmiyyət daşıyır və gələcəkdə konkret nəticələr verəcək.