SOCAR Gürcüstan üzərindən Avstriya və Almaniyaya qaz tədarükünə başlayıb

Azərbaycanın dövlət enerji şirkəti SOCAR Gürcüstan ərazisindən keçməklə Avstriya və Almaniyaya təbii qaz tədarükünə başlayıb.

InterPress.ge şirkətin yaydığı məlumata istinadən xəbər verir ki, “Cənub Qaz Dəhlizi”nin Avropa seqmenti olan Transadriatik Boru Kəməri (TAP) vasitəsilə nəql edilən əhəmiyyətli həcmdə qazın satışı Azərbaycanın qaz ixracında növbəti mühüm mərhələdir.

Qazın İtaliya üzərindən Avstriya və Almaniyaya çatdırılması Azərbaycan qazının Avropadakı coğrafiyasını daha da genişləndirir və alıcı ölkələrin sayını 16-ya çatdırır. Azərbaycan qazının Avropaya TAP vasitəsilə tədarükünə 2020-ci il 31 dekabr tarixində başlanılıb. Boru kəmərinin ilkin ötürücülük qabiliyyəti illik 10 milyard kubmetr olub, lakin bu göstəricinin 20 milyard kubmetrədək artırılması mümkündür.

2022-ci ilin iyulunda Azərbaycan ilə Avropa Komissiyası arasında 2027-ci ilədək Avropaya qaz tədarükünün ikiqat artırılması ilə bağlı razılaşma əldə olunub. Bu günədək TAP Avropa bazarına ümumilikdə 54,3 milyard kubmetr qaz nəql edib.

Məlumata görə, 2025-ci ildə Azərbaycanda 51,5 milyard kubmetr təbii qaz hasil edilib. Həmin dövrdə ümumi qaz ixracı 25,2 milyard kubmetr təşkil edib. Bunun 12,8 milyard kubmetri Avropaya, 9,6 milyard kubmetri Türkiyəyə, o cümlədən 5,6 milyard kubmetri TANAP vasitəsilə ötürülüb. Eyni zamanda 2,3 milyard kubmetr qaz Gürcüstana, 0,5 milyard kubmetr isə Suriyaya tədarük olunub.