Qiorqi Vaşadze həbsdən azad edilib: “7 ay çətin oldu, amma qələbəyə inam o qədər güclü idi ki, heç bir gün mənə ağır gəlmədi”

"Həbsdə keçirdiyim 7 ay çətin olsa da, qələbəyə inam məni ruhdan salmayıb."

InterPress.ge xəbər verir ki, bu barədə “Strategiya Ağmaşanebeli” partiyasının lideri Qiorqi Vaşadze cəzaçəkmə müəssisəsini tərk etdikdən sonra jurnalistlərə açıqlamasında bildirib.

Vaşadze qeyd edib ki, ona göstərilən dəstək böyük mənəvi güc verib və bu inam sayəsində həbs müddətində heç bir gününü ağır keçirməyib. O, tərəfdarlarına və onu dəstəkləyən hər kəsə təşəkkürünü bildirib.

“Çox əzmlə və nikbinliklə doluyuq. Emosiyalarım var, çünki bu qədər insanın dəstəyini hiss edirdim. Gürcüstanı salamlayıram. Əminəm və inanıram ki, qalib gələcəyik. Biz ədalətli, inkişaf edən, Avropa İttifaqının layiqli üzvü olan, beynəlxalq arenada təmsil olunan bir ölkədə yaşamaq istəyirik. Heç kimin yalnız fərqli fikrə görə həbs olunmadığı bir cəmiyyət arzulayırıq”, – deyə Vaşadze bildirib.

O vurğulayıb ki, həbsdə olarkən ən çox ailəsini – xüsusilə həyat yoldaşını və uşaqlarını darıxıb. Onun sözlərinə görə, insanların arasından birdən-birə təcrid olunmaq psixoloji baxımdan çətin olub, lakin fiziki və mənəvi hazırlığını qorumağa çalışıb.

Vaşadze həmçinin “vicdan məhbusları”nın və etiraz aksiyalarında iştirak etdiklərinə görə saxlanılan şəxslərin möhkəmliyini xüsusi qeyd edib, onların mübarizə əzminin cəmiyyət üçün ilham mənbəyi olduğunu bildirib. O, Rustaveli prospektində keçirilən etirazların bütün iştirakçılarına, fəal və vətənpərvər insanlara təşəkkür edib.

Məlumat üçün bildirək ki, Rustavi №12 Penitensiar Müəssisəsini tərk edən Qiorqi Vaşadzeni həbsxana qarşısında ailə üzvləri və yaxınları qarşılayıb. Xatırladaq ki, məhkəmə onu parlamentin müvəqqəti istintaq komissiyasının tələbini yerinə yetirməməkdə təqsirli bilmiş, 7 ay müddətinə azadlıqdan məhrum etmiş və 2 il müddətinə vəzifə tutmaq hüququnu məhdudlaşdırmışdı. Vaşadze məhkəmə qərarı ilə razılaşmadığını bəyan edib.