İran BMT baş katibinə məktub göndərib: ABŞ hücum edərsə, regiondakı hərbi obyektlər hədəf olacaq

İran Birləşmiş Millətlər Təşkilatının baş katibi Antonio Quterreşə məktub ünvanlayaraq bəyan edib ki, ABŞ İrana hücum edərsə, Yaxın Şərqdəki Amerika hərbi obyektləri legitim hədəflərə çevriləcək.

InterPress.ge xəbər verir ki, məktubun surətini Axios-un jurnalisti Barak Ravid sosial şəbəkədə paylaşıb.

Sənəddə qeyd olunur ki, Tehran müharibə istəmir, lakin Vaşinqton tərəfindən hərbi zərbə endiriləcəyi təqdirdə qəti və həlledici cavab verəcək.

“İstənilən hücum halında regionda düşmən qüvvələrinin bütün bazaları, obyektləri və aktivləri İranın müdafiə cavabı çərçivəsində legitim hədəfə çevriləcək. Birləşmiş Ştatlar istənilən gözlənilməz və nəzarətdənkənar nəticələrə görə tam və birbaşa məsuliyyət daşıyacaq”, – deyə İranın BMT-dəki Daimi Nümayəndəliyinin baş katibə göndərdiyi məktubda bildirilib.