Paşinyan: Ermənistanın Aİ-yə inteqrasiya yolunda əsas problem Aİ ilə Gürcüstan arasında dialoqun dondurulmasıdır

Ermənistanın Avropa İttifaqına inteqrasiya yolunda hazırda ən böyük problemlərdən biri Aİ ilə Gürcüstan arasında siyasi dialoqun dondurulmuş vəziyyətdə olmasıdır.

InterPress.ge xəbər verir ki, bu barədə Ermənistanın baş naziri Nikol Paşinyan Avropa Parlamentində çıxışı zamanı bildirib.

Paşinyanın sözlərinə görə, Gürcüstan Ermənistan üçün Avropa İttifaqına gedən əsas yoldur.

“Ermənistanda çoxları soruşur: Ermənistan nə vaxt Avropa İttifaqının üzvü olacaq? Bizim cavabımız çox aydındır – heç bir ölkə Aİ-nin standartlarını yerinə yetirmədən bu təşkilatın üzvü ola bilməz”, – deyə Paşinyan bildirib.

O qeyd edib ki, Ermənistanın əsas vəzifəsi Avropa tərəfdaşlarının dəstəyi ilə islahatlar yolunu davam etdirmək və Aİ-yə üzvlük meyarlarını obyektiv şəkildə yerinə yetirməkdir.

 

Paşinyanın sözlərinə görə, Ermənistan Aİ-yə üzvlük prosesinin başlanması barədə qanunu Gürcüstanın Aİ-yə namizəd statusu almasından sonra qəbul edib və bu addım ölkənin Avropa İttifaqına qoşulma perspektivini daha real edib.

 

Baş nazir bildirib ki, Ermənistan Aİ ilə Gürcüstan arasında konstruktiv siyasi prosesin bərpa olunmasını gözləyir.

 

“Bu, Ermənistan üçün də, Gürcüstan üçün də vacibdir”, – deyə Nikol Paşinyan vurğulayıb.