Natali Luaço: Avropa İttifaqından Gürcüstanla bağlı sərt tədbirlər görülməsini tələb edirik
Avropa Parlamentinin deputatı Natali Luaço Avropa Parlamentində çıxışı zamanı Avropa İttifaqını Gürcüstanla bağlı daha sərt tədbirlər görməyə çağırıb.
InterPress.ge-nin məlumatına görə, o bildirib ki, hazırda Avropa İttifaqı daxilində Tbilisi hakimiyyətinə qarşı ciddi sanksiyaların tətbiqi və ya onun beynəlxalq təcrid olunması üçün siyasi iradə mövcud deyil. Bununla belə, Luaçonun sözlərinə görə, Gürcüstan məsələsinə diqqət ayrılması vacibdir.
“Xoşbəxtlikdən, Avropa İttifaqında elə bir institut var ki, Gürcüstan məsələsinə gəldikdə Aİ-nin ləyaqətini qoruyur – bu, Avropa Parlamentidir. Tbilisidə hakim partiyaya tabe olmaqdan imtina edən hər kəs üçün yaşamaq demək olar ki, mümkünsüzdür. Müxalifət üzvləri, jurnalistlər, akademiklər və universitet tələbələri üçün repressiyalar istənilən an baş verə bilər. Biz Avropa İttifaqından sərt tədbirlərin görülməsini tələb edirik. Amma Şurada nə görürük? Tbilisi hakimiyyətinə qarşı ciddi sanksiyalar tətbiq etmək və ya onu təcrid etmək üçün siyasi iradə yoxdur. Vladimir Putin bizi izləyir və biz çox pis mesaj göndəririk. Gürcüstan üçün vaxt ayırmağa dəyər, lakin Komissiya orada demokratiya üçün heç nə etmədiyi halda bunu necə bacaracağıq?” – deyə Natali Luaço bildirib.
