Moskva mexanizmi: Gürcüstanın işi Beynəlxalq Cinayət Məhkəməsinə göndərilə bilər

Roma Statutuna qoşulan dövlətlər ölkədəki vəziyyətin Beynəlxalq Cinayət Məhkəməsinə (ICC) göndərilməsi məsələsini nəzərdən keçirə bilər.

InterPress.ge xəbər verir ki, bu barədə ATƏT-in “Moskva mexanizmi” çərçivəsində Gürcüstanla bağlı hazırlanmış hesabatda qeyd olunur.

Hesabatda bu tövsiyə beynəlxalq ictimaiyyətə ünvanlanan tövsiyələr bölməsində yer alıb.

Sənəddə qeyd olunur ki, Gürcüstanda siyasi təqiblərin, işgəncələrin və digər qeyri-insani rəftar hallarının sayının artması fonunda Roma Statutunun iştirakçı dövlətləri mövcud vəziyyətin Beynəlxalq Cinayət Məhkəməsinə göndərilməsini müzakirə edə bilər.

Hesabatda həmçinin bir sıra digər tövsiyələr də yer alıb. Belə ki, Avropa Şurasının İnsan Hüquqları üzrə komissarına Gürcüstana missiya göndərmək imkanını nəzərdən keçirmək tövsiyə olunur.

Eyni zamanda, Avropa Şurasının baş katibinin Gürcüstandan İnsan Hüquqları Konvensiyasının müddəalarının necə həyata keçirildiyi barədə izahat tələb edə biləcəyi qeyd edilir. Bu, İnsan Hüquqları üzrə Avropa Konvensiyasının 52-ci maddəsinə əsaslanır.