İri buynuzlu heyvanda quduzluq aşkarlanıb

Qurcaani bələdiyyəsinin Dedoplistskaro rayonunun Pirosmani kəndində iri buynuzlu heyvanda quduzluq qeydə alınıb.

InterPress.ge xəbər verir ki, bu barədə məlumatı Gürcüstanın Qida Milli Agentliyi yayıb.

Məlumata görə, agentliyin Kaxeti departamentinin inspektorları daxil olan məlumat əsasında qeyd olunan kənddə iri buynuzlu heyvanlara nəzarət tədbirləri həyata keçiriblər.

Agentliyin bildirdiyinə görə, heyvanda güclü tüpürcək ifrazı, səbəbsiz aqressiya, iştahanın itməsi və koordinasiya pozuntusu kimi əlamətlər müşahidə olunub.

“Agentliyin inspektorları patoloji material nümunələrini laboratoriyaya göndəriblər və laborator müayinələr nəticəsində quduzluq təsdiqlənib. Bu barədə məlumat dərhal yerli səhiyyə xidmətinə təqdim olunub.

Yoluxma qeydə alınan ərazi və ətraf zonada (3 km radiusda) karantin elan edilib. Agentlik tərəfindən dezinfeksiya işləri aparılıb, həssas heyvanlar quduzluğa qarşı peyvənd olunub, yoluxmuş heyvanla təmasda olan heyvanlara nəzarət gücləndirilib, həmçinin heyvanların hərəkətinə məhdudiyyətlər tətbiq edilib. Hazırda bələdiyyə üzrə 4500 baş heyvan peyvənd olunub.

Agentliyin həyata keçirdiyi profilaktik tədbirlər nəticəsində 2025-ci ildə quduzluq halları 2012-ci illə müqayisədə 93 faiz azalıb”, – deyə məlumatda qeyd olunub.