Marko Rubio: ABŞ Ukraynaya nəzərdə tutulan silahları Yaxın Şərqə yönləndirə bilər

ABŞ dövlət katibi Marko Rubio bildirib ki, Vaşinqton Ukrayna üçün nəzərdə tutulan silahların bir hissəsini Yaxın Şərqə yönləndirməyi nəzərdən keçirə bilər.

InterPress.ge xəbər verir ki, bu barədə məlumatı CNN yayıb.

Rubionun sözlərinə görə, belə qərar hələ qəbul olunmayıb, lakin bu variant istisna edilmir.

“Bu hələ baş verməyib. Heç nə yönləndirilməyib, amma mümkündür. ABŞ-ın hərbi ehtiyacı yaranarsa – istər ehtiyatların bərpası, istərsə də milli maraqlar çərçivəsində hər hansı missiyanın icrası üçün – biz həmişə öz maraqlarımızı birinci yerə qoyacağıq”, – deyə o bildirib.

Mediada yayılan məlumatlara görə, Donald Tramp administrasiyasının nümayəndələri müttəfiqləri xəbərdar ediblər ki, yaxın aylarda Ukraynaya ABŞ silahlarının tədarükü dayandırıla bilər. Bildirilir ki, Pentaqon bu silahların Yaxın Şərqdə istifadəsinə üstünlük verir.

Rubio eyni zamanda sanksiya altında olan rusiyalı deputatların ABŞ-a səfərinə də münasibət bildirib və qeyd edib ki, bu səfər əvvəlcədən planlaşdırılıb.

Onun sözlərinə görə, Rusiya nüvə silahına malik güclü dövlətdir və belə ölkələrlə hökumətlər səviyyəsində müəyyən əlaqələrin saxlanması vacibdir.