Marko Rubio: ABŞ olmadan NATO mövcud deyil

ABŞ dövlət katibi Marko Rubio bildirib ki, ABŞ olmadan NATO-nun mövcudluğu mümkün deyil.

InterPress.ge xəbər verir ki, Rubio bu barədə Al Jazeera telekanalına müsahibəsində danışıb.

O, İranla bağlı proseslər zamanı ABŞ-ın müttəfiqlərinin davranışına da toxunaraq qeyd edib ki, əməliyyat başa çatdıqdan sonra prezident bu məsələyə yenidən baxmalı olacaq.

Rubionun sözlərinə görə, NATO ABŞ üçün ona görə faydalıdır ki, gözlənilməz hallarda hərbi bazalardan istifadə imkanı yaradır. Lakin bəzi üzv ölkələr, o cümlədən İspaniya, ABŞ-a öz hava məkanından istifadə etməyə icazə verməyib.

“Bizim milli təhlükəsizliyimiz üçün ciddi risk yarananda və əməliyyat keçirmək zərurəti olduqda, bəzi NATO ölkələri, o cümlədən İspaniya, hava məkanından istifadə etməyə icazə vermədi. Digər ölkələr də eyni addımı atdı. Mən NATO-nun tərəfdarıyam, amma əgər biz Avropanı qoruyuruq, onlar isə ehtiyac olanda bizə dəstək vermirlərsə, bu, yaxşı razılaşma deyil və yenidən qiymətləndirilməlidir”, – deyə Rubio bildirib.

O əlavə edib ki, əgər ABŞ Avropadan qoşunlarını çıxarmaq qərarı versə, bu, NATO-nun sonu demək olacaq.

“Bizim Avropada on minlərlə hərbçimiz və milyardlarla dollar dəyərində silahımız var. Bunlar Avropanın müdafiəsi üçündür. ABŞ olmadan NATO mövcud deyil və bunu hər kəs anlayır. NATO alyansdır və alyans qarşılıqlı faydaya əsaslanmalıdır”, – deyə ABŞ dövlət katibi vurğulayıb.