Kaladze Gürcüstanda yanacaq qiymətlərinin artımına belə münasibət bildirdi

Tbilisi meri Kaxa Kaladze bildirib ki, yanacaq qiymətlərinin artması Yaxın Şərqdə baş verən hadisələrlə əlaqədardır və bu problem təkcə Gürcüstana deyil, bütün dünyaya təsir edir.

InterPress.ge xəbər verir ki, Kaladze bu barədə jurnalistlərin sualını cavablandırarkən danışıb.

Onun sözlərinə görə, regionda yaranmış vəziyyət kifayət qədər ağırdır və bu, qlobal bazarlara birbaşa təsir göstərir.

“Hadisələri izləyən hər kəs görür ki, Yaxın Şərqdə vəziyyət nə qədər ağırdır. Məncə, burada sual yoxdur və qiymət artımının səbəbi hamıya aydındır. Bu problem təkcə bizdə deyil, ümumilikdə dünyada müşahidə olunur. Avropanın müxtəlif ölkə və şəhərlərində yanacaq çatışmazlığı və problemlər müzakirə olunur. Bu, yalnız bizim üçün deyil, bütün dünya üçün ciddi çağırışdır”, – deyə Kaladze bildirib.

Mer vurğulayıb ki, yanacaq qiymətlərində artım məhz Yaxın Şərqdə davam edən proseslərlə şərtlənir.