Gürcüstanda hər ikinci vətəndaşın krediti var – hər onuncu şəxs gecikmədədir

Gürcüstanda faktiki olaraq hər ikinci vətəndaşın maliyyə sektoru qarşısında borcu var, hər onuncu şəxs isə kredit ödənişlərini gecikdirir.

InterPress.ge xəbər verir ki, bu barədə “Kreditinfo Gürcüstan”ın 2026-cı ilin mart ayına dair son statistik məlumatlarında qeyd olunur.

Məlumata əsasən, ölkədə kreditlər üzrə gecikmə səviyyəsi əhalinin 10.1%-ni təşkil edir.

2026-cı il 31 mart tarixinə Gürcüstanda 1 984 700 nəfərin maliyyə sektoru qarşısında borcu var. Onlardan 372 477 nəfərin 30 gündən artıq gecikməsi qeydə alınıb. Bu isə “Sakstat”ın son məlumatına görə, 3 704 506 nəfər olan ölkə əhalisinin əhəmiyyətli hissəsini təşkil edir.

Statistikaya görə, 30 gündən çox gecikməsi olan şəxslərin sayı son bir ildə 7 068 nəfər artıb, son bir ayda isə 1 182 nəfər azalıb. Müqayisə üçün qeyd edək ki, 2026-cı ilin fevral ayının sonunda bu göstərici 373 659 nəfər, 2025-ci ilin martında isə 365 409 nəfər olub.

Eyni zamanda, 2026-cı il 31 mart vəziyyətinə əsasən, kredit borcunu ödəyə bilməyənlərdən 101 026 nəfər kommersiya banklarının müştərisidir, 301 330 nəfər Milli Bank tərəfindən tənzimlənən digər maliyyə institutlarının (mikromaliyyə və kredit təşkilatları) borcalanlarıdır, 4 548 nəfər isə digər təşkilatlar – tikinti şirkətləri, distribyutorlar, lizinq şirkətləri və s. qarşısında borcludur.

Gecikmiş kreditlər üzrə ümumi qalıq borc 2.933 milyard lari təşkil edir ki, bu da maliyyə sektoru tərəfindən verilmiş ümumi kredit portfelinin 3.8%-nə bərabərdir.

Ümumilikdə isə, “Kreditinfo Gürcüstan”ın məlumatına görə, ölkədə verilmiş kreditlərin ümumi həcmi 77.2 milyard larini ötür.