Qonşusunu bıçaqlayaraq qaçan şəxs saxlanıldı

Saqareco bələdiyyəsində qəsdən adam öldürməkdə təqsirləndirilən şəxs saxlanılıb.

InterPress.ge xəbər verir ki, bu barədə Daxili İşlər Nazirliyi məlumat yayıb.

Məlumata görə, əvvəllər məhkum olunmuş, 1953-cü il təvəllüdlü D.Ş. mübahisə zəminində soyuq silahdan istifadə edərək qonşusu – 1969-cu il təvəllüdlü Q.K.-nı yaralayıb və hadisə yerindən qaçıb. Aldığı xəsarətlər nəticəsində zərərçəkmiş hadisə yerində həyatını itirib.

Hüquq-mühafizə orqanlarının keçirdiyi əməliyyat tədbirləri nəticəsində təqsirləndirilən şəxs hadisədən qısa müddət sonra “isti izlərlə” saxlanılıb. Cinayətin aləti – bıçaq maddi sübut kimi götürülüb.

Faktla bağlı araşdırma Cinayət Məcəlləsinin 108-ci maddəsi ilə aparılır ki, bu da 15 ilədək azadlıqdan məhrumetmə cəzasını nəzərdə tutur.