İrakli Kobaxidze: Gürcüstanda son illərdə 5 inqilab cəhdi olub

“Gürcüstanda son illərdə beş inqilab cəhdi olub və onların əksəriyyəti zorakı xarakter daşıyıb.”

InterPress.ge xəbər verir ki, Gürcüstanın baş naziri İrakli Kobaxidze bu açıqlamanı Türkiyənin Antalya şəhərində jurnalistlərə verib.

Onun sözlərinə görə, bu cür cəhdlərin təkrarlanmasına yol verilməyəcək və hökumət bunun qarşısını almaq üçün bütün addımları atacaq.

“Əvvəl Akkerman var idi, sonra başqaları oldu, indi isə Blajevic var. Soyadlar dəyişir, amma əsas məsələ onların arxasında kimin dayanmasıdır”, – deyə baş nazir qeyd edib.

Kobaxidze bildirib ki, ölkədə xarici müdaxilə, o cümlədən maliyyə müdaxiləsi vasitəsilə vəziyyəti sabitsizləşdirmək cəhdləri müşahidə olunur.

Onun sözlərinə görə, hökumət qeyri-hökumət təşkilatlarının maliyyələşdirilməsi ilə bağlı qəbul edilən qanunvericilik də daxil olmaqla bir sıra addımlar sayəsində vəziyyəti stabilləşdirə bilib.

“Biz məsuliyyət götürürük ki, bu sabitlik qorunacaq”, – deyə İrakli Kobaxidze vurğulayıb.