Mixeil Sarjveladze: Gürcüstanda əsas dərmanların keyfiyyəti inkişaf etmiş ölkələrlə eynidir

Gürcüstanda əsas (esensial) dərman vasitələrinin keyfiyyəti inkişaf etmiş ölkələrdə mövcud olan dərmanlarla eynidir.

InterPress.ge xəbər verir ki, bu barədə Mixeil Sarjveladze parlamentdə interpellasiya qaydasında çıxışı zamanı bildirib.

Nazirin sözlərinə görə, dövlət tərəfindən proqram çərçivəsində alınan dərmanlar ciddi standartlar, tələblər və şərtlər əsasında seçilir.

“Gürcüstanda mövcud dərmanların keyfiyyəti ilə bağlı ciddi arqument irəli sürmək, məncə, mümkün deyil. Əsas, həyati əhəmiyyətli dərmanlardan danışarkən, ölkədə inkişaf etmiş dövlətlərlə eyni keyfiyyətdə preparatlar mövcuddur”, – deyə Mixeil Sarjveladze qeyd edib.

Sarjveladze bildirib ki, bəzi hallarda proqramdan kənar dərmanlara üstünlük verilməsi həm həkimlər, həm də pasiyentlər tərəfindən baş verir.

Onun sözlərinə görə, bu məsələdə iki əsas amil nəzərə alınmalıdır: birincisi, bu cür dərmanların fərdi sifariş yolu ilə ölkəyə gətirilməsi mexanizmləri mövcuddur; ikincisi isə hər bir istehsalçının öz siyasəti var və bütün dərman növlərinin hər ölkəyə idxalı mümkün deyil.

Nazir vurğulayıb ki, bütün dərman preparatlarının eyni anda hər hansı bir ölkədə mövcud olması praktiki olaraq mümkün deyil.