“Retail Assosiasiyası” qiymətlərlə bağlı parlament komissiyasının tövsiyələrinə münasibət bildirib

Gürcüstanda Retail Assosiasiyası parlamentin ərzaq məhsulları, dərman vasitələri və yanacaq qiymətlərinin formalaşmasını araşdıran müvəqqəti komissiyasının hesabatı ilə tanış olduğunu açıqlayıb.

InterPress.ge xəbər verir ki, bu barədə assosiasiyanın yaydığı bəyanatda qeyd olunub.

Məlumata görə, komissiyanın hazırladığı sənəd geniş həcmli olub və orta və uzunmüddətli tədbirlərlə bağlı tövsiyələri əhatə edir. Assosiasiya xüsusilə Fransa və Yunanıstan təcrübəsini diqqətə layiq hesab etdiyini bildirib.

Qeyd olunur ki, bu ölkələrin modeli bazara kobud müdaxiləyə deyil, rəqabət mexanizmlərinin gücləndirilməsinə əsaslanır. Bu təcrübələr əsasında sektor nümayəndələri qısamüddətli dövrdə real nəticələr əldə etməyə imkan verən yanaşma hazırlayıblar.

Bəyanatda vurğulanır ki, assosiasiyaya üzv şirkətlər artıq “ailə səbəti” çərçivəsində xüsusi qiymət siyasətinin tətbiq ediləcəyi məhsulların müəyyənləşdirilməsinə başlayıblar. Bu çərçivədə seçilmiş məhsullara daimi olaraq xüsusi təkliflər tətbiq olunacaq.

Assosiasiya bildirir ki, bu təşəbbüsün effektivliyi təchizat zəncirində iştirak edən bütün tərəflərdən asılıdır və istehsalçıların, eləcə də tədarükçülərin də bu yanaşmanı dəstəkləyəcəyi gözlənilir.

“Retail Assosiasiyası” əlavə edib ki, dövlət qurumları və özəl sektorla əməkdaşlığı davam etdirməyə hazırdır və məqsəd əhalinin əsas məhsullara çıxışının təmin edilməsi üçün davamlı və uzunmüddətli nəticələrin əldə olunmasıdır.