Papuaşvili: Zelenskinin təşəbbüsü əvvəlki siyasətin səhv olduğunu göstərir
Gürcüstan parlamentinin sədri Şalva Papuaşvili Ukrayna prezidenti Volodimir Zelenskinin Gürcüstanın baş naziri ilə görüş təşəbbüsünü əvvəlki siyasətin yanlış olduğunun göstəricisi kimi qiymətləndirib.
InterPress.ge xəbər verir ki, Gürcüstan parlamentinin sədri Şalva Papuaşvili açıqlamasında bildirib ki, Zelenskinin baş nazir İrakli Kobaxidze ilə görüş təşəbbüsü ədalətsiz siyasətin uğursuzluğa məhkum olduğunu nümayiş etdirir.
Papuaşvilinin sözlərinə görə, Ukrayna prezidenti daha əvvəl Kobaxidzeni sanksiya siyahısına daxil etmişdi və indi onunla görüşmək məcburiyyətində qalıb.
“Düşünürəm ki, bu fakt özü göstərir ki, Ukrayna hakimiyyətinin gürcü xalqına münasibətdə siyasəti nə qədər yanlış olub və bu, həmin siyasətin yenidən nəzərdən keçirilməsinin əlamətidir. Gürcü xalqına qarşı yönəlmiş siyasət nəticə vermir və xalqın maraqlarına zidd qüvvələrə dəstək yaxşı nəticə gətirməyəcək.
Biz hər zaman deyirdik ki, təkcə Ukrayna ilə deyil, Gürcüstan əhalisinə qarşı ədalətsiz siyasət yürüdən bütün ölkə və hökumətlərlə münasibətlərdə belə, biz birtərəfli dostluq formatında qalırıq. Bu o deməkdir ki, bu münasibətlərdə biz haqlıyıq. Gürcüstana qarşı yanlış addımlar atanlar sonda bunun səhv olduğunu anlayacaqlar. Biz hər zaman bu münasibətləri yenidən nəzərdən keçirməyə hazırıq.
Dörd ildən artıqdır ki, Ukrayna hakimiyyətindən təəssüf ki, gürcü xalqına qarşı yönəlmiş və hətta Ukrayna xalqının maraqlarına da xidmət etməyən siyasət görürük. Bu münasibətlər məhz Ukrayna hakimiyyətinin qərarları nəticəsində hazırkı vəziyyətə gəlib çatıb. Biz isə hər zaman vurğulamışıq ki, Gürcüstan və onun hökuməti Ukrayna xalqını və Ukraynanı dəstəkləyib. Elə bir qətnamə yoxdur ki, biz onu dəstəkləməyək.
Əgər kiminsə atmalı və düzəltməli olduğu addım varsa, bu Ukrayna hakimiyyətidir. Sənin ölkənin və xalqının yanında olan hökumət nümayəndələrinə sanksiya tətbiq etmək minnətdarlıq deyil. Bundan əlavə, hamımız şahidi olmuşuq ki, prezident Zelenski açıq şəkildə Gürcüstan hakimiyyətindən döyüşçülərin təşkil edilərək Ukraynaya göndərilməsini və bununla da Rusiyaya qarşı müharibəyə qoşulmasını tələb edirdi. Buna gürcü dilində “müharibəyə cəlb etmək” deyilir, ukrayna dilində necə adlandırıldığını bilmirəm”, – deyə Şalva Papuaşvili bildirib.
