Papuaşvili: ABŞ-la münasibətlər keyfiyyətcə yeni məzmun əsasında qurulmalıdır

Gürcüstan parlamentinin sədri Şalva Papuaşvili ABŞ-ın yeni administrasiyasının Gürcüstanın mövqeyini yaxşı bildiyini və iki ölkə arasında münasibətlərin yenilənməsi üçün konkret addımların vacibliyini vurğulayıb.

InterPress.ge xəbər verir ki, Şalva Papuaşvili açıqlamasında bildirib ki, hakim komanda ABŞ-la münasibətlərin sadəcə bərpasından deyil, keyfiyyətcə yeni tərəfdaşlığın formalaşdırılmasından danışır.

Papuaşvilinin sözlərinə görə, yeni tərəfdaşlıq hər iki xalqın milli maraqlarına əsaslanmalıdır.

“Biz əvvəlki vəziyyətə qayıtmaqdan danışmırıq. Çünki əvvəlki administrasiya dövründə strateji tərəfdaşlıq formal xarakter daşıyırdı və Gürcüstanın daxili işlərinə müdaxilə, hakimiyyətin qeyri-demokratik yollarla dəyişdirilməsinə cəhdlər müşahidə olunurdu.

Tərəfdaşlıq deyəndə biz münasibətlərin bərpasını deyil, keyfiyyətcə yeni əməkdaşlığın qurulmasını nəzərdə tuturuq. Bu əməkdaşlıq hər iki xalqın milli maraqlarının nəzərə alınmasına əsaslanmalıdır.

Biz bu məsələdə bütün tərəfdaşlara və potensial tərəfdaşlara qarşı açıq və səmimiyik, eyni yanaşma ABŞ-a da aiddir. Ümid edirəm ki, ABŞ tərəfindən də münasibətlərin yenilənməsi istiqamətində addımlar atılacaq və tərəflər bərabər səviyyədə öz xalqlarının maraqları barədə ciddi dialoq aparacaqlar”, – deyə Şalva Papuaşvili bildirib.